ਤਾਜਾ ਖ਼ਬਰਾਂ


ਮੁੱਖ ਮੰਤਰੀ ਵੱਲੋਂ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 2-2 ਲੱਖ ਰੁਪਏ ਦੇਣ ਦਾ ਐਲਾਨ
. . .  about 1 hour ago
ਅੰਮ੍ਰਿਤਸਰ, 23 ਸਤੰਬਰ ( ਸੁਰਿੰਦਰ ਸਿੰਘ ਵਰਪਾਲ )-ਬੀਤੀ ਸ਼ਾਮ ਕਵਾੜ ਦੀ ਦੁਕਾਨ ਵਿਚ ਹੋਏ ਧਮਾਕੇ ਕਾਰਨ ਮਾਰੇ ਗਏ 2 ਵਿਅਕਤੀਆਂ ਦੇ ਪਰਿਵਾਰਾਂ ਨਾਲ ਗਹਿਰੇ ਦੁੱਖ ਦਾ ਪ੍ਰਗਟਾਵਾ ਕਰਦੇ ਮੁੱਖ ਮੰਤਰੀ ਪੰਜਾਬ ਕੈਪਟਨ...
ਸੰਗਤਾਂ ਲਈ ਤੋਹਫ਼ਾ,ਦਿੱਲੀ-ਲੋਹੀਆਂ ਖ਼ਾਸ 'ਇੰਟਰਸਿਟੀ ਸੁਪਰ ਫਾਸਟ' ਰੇਲ ਗੱਡੀ 4 ਅਕਤੂਬਰ ਤੋਂ ਚੱਲੇਗੀ
. . .  about 1 hour ago
ਲੋਹੀਆਂ ਖ਼ਾਸ, 23 ਸਤੰਬਰ (ਗੁਰਪਾਲ ਸਿੰਘ ਸ਼ਤਾਬਗੜ੍ਹ) -ਸੁਲਤਾਨਪੁਰ ਲੋਧੀ ਵਿਖੇ ਵਿਸ਼ਵ ਪੱਧਰ 'ਤੇ 12 ਨਵੰਬਰ ਨੂੰ ਮਨਾਏ ਜਾ ਰਹੇ 'ਪਹਿਲੀ ਪਾਤਸ਼ਾਹੀ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਪ੍ਰਕਾਸ਼ ਪੁਰਬ' ਨੂੰ ਮਨਾਉਣ ਲਈ...
ਪ੍ਰਧਾਨ ਮੰਤਰੀ ਮੋਦੀ ਸੰਯੁਕਤ ਰਾਸ਼ਟਰ 'ਚ ਮੌਸਮ ਤਬਦੀਲੀ ਬਾਰੇ ਬੋਲੇ ਕਿ ਅਸੀਂ ਵਾਤਾਵਰਨ ਦੀ ਰੱਖਿਆ ਲਈ ਕਦਮ ਚੁੱਕ ਰਹੇ ਹਾਂ
. . .  about 1 hour ago
ਛੇਹਰਟਾ : ਅਚਾਨਕ ਹੋਏ ਧਮਾਕੇ 'ਚ 2 ਵਿਅਕਤੀਆਂ ਦੀ ਮੌਤ, 7 ਜ਼ਖਮੀ
. . .  about 3 hours ago
ਛੇਹਰਟਾ, 23 ਸਤੰਬਰ (ਸੁਰਿੰਦਰ ਸਿੰਘ ਵਿਰਦੀ)- ਗੁਰੂ ਅਰਜਨ ਦੇਵ ਨਗਰ ਵਾਰਡ ਨੰ 54 ਦੇ ਨਾਲ ਲਗਦੇ ਇਲਾਕੇ ਲਵ ਕੁਸ਼ ਨਗਰ 'ਚ ਅੱਜ ਸ਼ਾਮ ਧਮਾਕਾ ਹੋਣ ਦੀ ਖ਼ਬਰ ....
ਸੜਕ ਹਾਦਸੇ 'ਚ ਮੋਟਰਸਾਈਕਲ ਸਵਾਰ ਵਿਅਕਤੀ ਦੀ ਮੌਤ
. . .  about 3 hours ago
ਟਾਂਗਰਾ, 23 ਸਤੰਬਰ (ਹਰਜਿੰਦਰ ਸਿੰਘ ਕਲੇਰ)- ਜੀ.ਟੀ ਰੋਡ ਟਾਂਗਰਾ 'ਤੇ ਇਕ ਤੇਜ ਰਫ਼ਤਾਰ ਸਵਿਫ਼ਟ ਕਾਰ ਮੋਟਰਸਾਈਕਲ ਦੇ ਪਿਛਲੇ ਪਾਸਿਉਂ ਟਕਰਾ ਗਈ ...
ਕਾਂਗਰਸ ਤੋਂ ਬਾਅਦ ਹੁਣ ਅਕਾਲੀ ਦਲ ਨੇ ਜ਼ਿਮਨੀ ਚੋਣਾਂ ਲਈ ਉਮੀਦਵਾਰ ਦਾ ਕੀਤਾ ਐਲਾਨ
. . .  about 3 hours ago
ਅਜਨਾਲਾ, 23 ਸਤੰਬਰ (ਗੁਰਪ੍ਰੀਤ ਸਿੰਘ ਢਿੱਲੋਂ)- ਪੰਜਾਬ ਦੇ ਚਾਰ ਵਿਧਾਨ ਸਭਾ ਹਲਕਿਆਂ 'ਤੇ ਜ਼ਿਮਨੀ ਚੋਣਾਂ ਹੋਣ ਜਾ ਰਹੀਆਂ ...
ਬਾਬਾ ਫ਼ਰੀਦ ਹਾਕੀ ਗੋਲਡ ਕੱਪ : ਲੜਕਿਆਂ ਦੀ ਪੰਜਾਬ ਐਂਡ ਸਿੰਧ ਬੈਂਕ ਤੇ ਲੜਕੀਆਂ ਦੀ ਸੋਨੀਪਤ ਅਕੈਡਮੀ ਟੀਮ ਜੇਤੂ
. . .  about 4 hours ago
ਫ਼ਰੀਦਕੋਟ 23 ਸਤੰਬਰ (ਜਸਵੰਤ ਪੁਰਬਾ, ਸਰਬਜੀਤ ਸਿੰਘ) - ਇੱਥੇ ਚਲ ਰਹੇ ਆਲ ਇੰਡੀਆ ਬਾਬਾ ਫ਼ਰੀਦ ਹਾਕੀ ਗੋਲਡ ਕੱਪ 'ਤੇ ਪੰਜਾਬ ਐਂਡ ਸਿੰਧ ਬੈਂਕ ਨੇ ਖ਼ਿਤਾਬੀ ਜਿੱਤ ਹਾਸਿਲ ਕੀਤੀ...
ਮਿਆਦ ਲੰਘਣ ਤੋਂ ਬਾਅਦ ਆਪਣੇ ਕੋਲ ਰਿਵਾਲਵਰ ਰੱਖਣ 'ਤੇ ਵਿਅਕਤੀ ਖ਼ਿਲਾਫ਼ ਮਾਮਲਾ ਦਰਜ
. . .  about 3 hours ago
ਹਰੀਕੇ ਪੱਤਣ, 23 ਸਤੰਬਰ (ਸੰਜੀਵ ਕੁੰਦਰਾ)- ਹਥਿਆਰ ਦੀ ਲਾਇਸੈਂਸ ਮਿਆਦ ਲੰਘਣ ਤੋਂ ਬਾਅਦ ਰਿਵਾਲਵਰ ਕੋਲ ਰੱਖਣ 'ਤੇ ਥਾਣਾ ਹਰੀਕੇ ਪੁਲਿਸ ਨੇ ਇਕ ...
ਸਾਬਕਾ ਭਾਰਤੀ ਕ੍ਰਿਕਟਰ ਮਾਧਵ ਆਪਟੇ ਦਾ ਦੇਹਾਂਤ
. . .  about 4 hours ago
ਮੁੰਬਈ, 23 ਸਤੰਬਰ - ਸਾਬਕਾ ਭਾਰਤੀ ਕ੍ਰਿਕਟਰ ਮਾਧਵ ਆਪਟੇ ਦਾ ਅੱਜ ਦਿਹਾਂਤ ਹੋ ਗਿਆ। ਉਹ 86 ਸਾਲਾ ਦੇ ਸਨ। ਇਸ ਦੀ ਜਾਣਕਾਰੀ ਦਿੰਦਿਆਂ ਮਾਧਵ....
ਬਾਬਾ ਫਰੀਦ ਜੀ ਦੇ ਆਗਮਨ ਪੁਰਬ ਮੌਕੇ ਇਮਾਨਦਾਰੀ ਅਤੇ ਮਾਨਵਤਾ ਦੀ ਸੇਵਾ ਲਈ ਦਿੱਤੇ ਗਏ ਐਵਾਰਡ
. . .  about 4 hours ago
ਫ਼ਰੀਦਕੋਟ, 23 ਸਤੰਬਰ (ਜਸਵੰਤ ਸਿੰਘ ਪੁਰਬਾ, ਸਰਬਜੀਤ ਸਿੰਘ)- ਬਾਬਾ ਫ਼ਰੀਦ ਜੀ ਦੇ ਆਗਮਨ ਪੁਰਬ ਮੌਕੇ ਗੁਰਦੁਆਰਾ ਗੋਦੜੀ ਸਾਹਿਬ ਵਿਖੇ ਇੱਕ ਧਾਰਮਿਕ ਸਮਾਗਮ ਦੌਰਾਨ ਬਾਬਾ...
ਹੋਰ ਖ਼ਬਰਾਂ..

ਨਾਰੀ ਸੰਸਾਰ

ਜੇ ਤੁਸੀਂ ਚਲਾਉਂਦੇ ਹੋ ਦੋਪਹੀਆ ਵਾਹਨ ਤਾਂ ਰੱਖੋ ਇਨ੍ਹਾਂ ਗੱਲਾਂ ਦਾ ਖ਼ਿਆਲ

ਬਦਲਦੇ ਯੁੱਗ ਨੇ ਵਿੱਦਿਆ ਦਾ ਪਸਾਰ ਵੀ ਕੀਤਾ ਹੈ ਤੇ ਸੁੱਖ ਸਹੂਲਤਾਂ ਵਿਚ ਵਾਧਾ ਵੀ। ਅਜੋਕੇ ਸਮੇਂ ਵਿਚ ਲੜਕੀਆਂ ਨੂੰ ਉੱਚ ਵਿੱਦਿਆ ਦੁਆਉਣਾ ਜਾਂ ਮਹਿਲਾਵਾਂ ਦਾ ਆਪਣੇ ਪੈਰਾਂ 'ਤੇ ਖੜ੍ਹੇ ਹੋਣ ਦੇ ਨਾਲ-ਨਾਲ ਆਪਣੇ ਪਰਿਵਾਰ ਦੀ ਆਰਥਿਕ ਹਾਲਤ ਸੁਧਾਰਨ ਹਿਤ ਨੌਕਰੀ ਕਰਨਾ ਕੋਈ ਅਚੰਭੇ ਵਾਲੀ ਗੱਲ ਨਹੀਂ ਰਹਿ ਗਿਆ ਹੈ। ਅੱਜ ਲੜਕੀਆਂ ਨੂੰ ਉੱਚ ਵਿੱਦਿਆ ਲਈ ਕਾਲਜਾਂ, ਯੂਨੀਵਰਸਿਟੀਆਂ ਅਤੇ ਕੋਚਿੰਗ ਸੈਂਟਰਾਂ ਵਿਚ ਜਾਣ ਲਈ ਅਤੇ ਨੌਕਰੀਪੇਸ਼ਾ ਲੜਕੀਆਂ ਤੇ ਮਹਿਲਾਵਾਂ ਨੂੰ ਆਪੋ-ਆਪਣੇ ਅਦਾਰਿਆਂ ਤੱਕ ਪੁੱਜਣ ਲਈ ਦੋਪਹੀਆ ਵਾਹਨਾਂ ਦੀ ਵਰਤੋਂ ਕਰਨੀ ਪੈਂਦੀ ਹੈ। ਸੜਕ 'ਤੇ ਦੋਪਹੀਆ ਵਾਹਨ ਚਲਾਉਂਦੇ ਸਮੇਂ ਕੁਝ ਗੱਲਾਂ ਦਾ ਧਿਆਨ ਰੱਖਣ ਦੀ ਬੇਹੱਦ ਜ਼ਰੂਰਤ ਹੁੰਦੀ ਹੈ ਤੇ ਜੇਕਰ ਤੁਸੀਂ ਮਹਿਲਾ ਹੋ ਤਾਂ ਹੇਠਾਂ ਦਿੱਤੇ ਸੁਝਾਅ ਤੁਹਾਡੇ ਲਈ ਹੀ ਹਨ :
* ਪੰਜਾਬ ਸਮੇਤ ਕਈ ਰਾਜਾਂ ਵਿਚ ਇਹ ਵੇਖਣ ਵਿਚ ਆਇਆ ਹੈ ਕਿ ਦੋਪਹੀਆ ਵਾਹਨ ਚਲਾਉਂਦੇ ਸਮੇਂ 80 ਫ਼ੀਸਦੀ ਔਰਤਾਂ ਹੈਲਮੇਟ ਦੀ ਵਰਤੋਂ ਨਹੀਂ ਕਰਦੀਆਂ, ਜੋ ਕਿ ਇਕ ਵੱਡੀ ਅਣਗਹਿਲੀ ਹੈ ਤੇ ਹਾਦਸਾ ਵਾਪਰ ਜਾਣ 'ਤੇ ਜਾਨ ਵੀ ਲੈ ਸਕਦੀ ਹੈ। ਇਸ ਲਈ ਤੁਸੀਂ ਚਾਹੇ ਖ਼ੁਦ ਦੋਪਹੀਆ ਵਾਹਨ ਚਲਾ ਰਹੇ ਹੋ ਜਾਂ ਅਜਿਹਾ ਵਾਹਨ ਚਲਾ ਰਹੇ ਕਿਸੇ ਸ਼ਖ਼ਸ ਦੇ ਪਿੱਛੇ ਬੈਠੇ ਹੋ, ਹੈਲਮੇਟ ਦੀ ਵਰਤੋਂ ਜ਼ਰੂਰ ਕਰੋ।
* ਟ੍ਰੈਫ਼ਿਕ ਪੁਲਿਸ ਦੇ ਅਧਿਕਾਰੀਆਂ ਤੇ ਕਰਮਚਾਰੀਆਂ ਅਨੁਸਾਰ ਜ਼ਿਆਦਾਤਰ ਔਰਤਾਂ ਦੋਪਹੀਆ ਵਾਹਨ ਚਲਾਉਂਦੇ ਸਮੇਂ ਬੈਕਵਿਊ ਮਿਰਰ ਭਾਵ ਪਿੱਛੇ ਵੇਖਣ ਵਾਲੇ ਸ਼ੀਸ਼ੇ ਦਾ ਜਾਂ ਮੋੜ ਕੱਟਣ ਸਮੇਂ ਇਸ਼ਾਰਿਆਂ ਦਾ ਇਸਤੇਮਾਲ ਬਿਲਕੁਲ ਨਹੀਂ ਕਰਦੀਆਂ, ਜਿਸ ਕਰਕੇ ਓਵਰਟੇਕ ਕਰਨ ਸਮੇਂ ਜਾਂ ਮੋੜ ਕੱਟਣ ਸਮੇਂ ਜਿੱਥੇ ਵਾਹਨ ਚਾਲਕ ਨਾਲ ਹਾਦਸਾ ਵਾਪਰਨ ਦਾ ਡਰ ਬਣਿਆ ਰਹਿੰਦਾ ਹੈ, ਉੱਥੇ ਹੀ ਪਿੱਛੇ ਤੋਂ ਆ ਰਹੇ ਵਾਹਨ ਦਾ ਵੀ ਜਾਨੀ ਤੇ ਮਾਲੀ ਨੁਕਸਾਨ ਹੋਣ ਦੀ ਸੰਭਾਵਨਾ ਬਣੀ ਰਹਿੰਦੀ ਹੈ। ਇਸ ਲਈ ਤੁਸੀਂ ਜੇਕਰ ਬੈਕਵਿਊ ਮਿਰਰ ਤੇ ਇਸ਼ਾਰਿਆਂ ਦਾ ਇਸਤੇਮਾਲ ਨਹੀਂ ਕਰਦੇ ਹੋ ਤਾਂ ਇਸ ਜਾਨਲੇਵਾ ਤੇ ਬੁਰੀ ਆਦਤ ਨੂੰ ਅੱਜ ਹੀ ਤਿਆਗ ਦਿਓ ਤੇ ਆਪਣੇ ਅਤੇ ਦੂਜਿਆਂ ਦੇ ਭਲੇ ਲਈ ਉਕਤ ਸੁਝਾਅ 'ਤੇ ਅਮਲ ਕਰੋ।
* ਘਰੋਂ ਵਾਹਨ ਲਿਜਾਣ ਸਮੇਂ ਹਮੇਸ਼ਾ ਖ਼ਿਆਲ ਰੱਖੋ ਕਿ ਤੁਹਾਡਾ ਕਾਨੂੰਨੀ ਤੌਰ 'ਤੇ ਜਾਇਜ਼ ਡਰਾਈਵਿੰਗ ਲਾਈਸੈਂਸ, ਵਾਹਨ ਦਾ ਰਜਿਸਟ੍ਰੇਸ਼ਨ ਕਾਰਡ ਅਤੇ ਵਾਹਨ ਦਾ ਸਹੀ ਮਿਆਦ ਤੱਕ ਪ੍ਰਦੂਸ਼ਣ ਮੁਕਤ ਹੋਣ ਦਾ ਸਰਟੀਫ਼ਿਕੇਟ ਆਦਿ ਦਸਤਾਵੇਜ਼ ਤੁਹਾਡੇ ਕੋਲ ਮੌਜੂਦ ਹੋਣ, ਤਾਂ ਜੋ ਟ੍ਰੈਫ਼ਿਕ ਪੁਲਿਸ ਵਲੋਂ ਕੀਤੀ ਜਾਂਦੀ ਚੈਕਿੰਗ ਸਮੇਂ ਭਰੇ ਬਾਜ਼ਾਰ ਵਿਚ ਤੁਹਾਨੂੰ ਕਿਸੇ ਤਰ੍ਹਾਂ ਦੀ ਮਾਨਸਿਕ ਪ੍ਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ ਤੇ ਚਲਾਨ ਕਟਵਾਉਣ ਆਦਿ ਦੀ ਨੌਬਤ ਹੀ ਨਾ ਆਵੇ।
* ਵਾਹਨ ਚਲਾ ਕੇ ਆਪਣੀ ਮੰਜ਼ਿਲ ਵੱਲ ਵਧਣ ਤੋਂ ਪਹਿਲਾਂ ਚੰਗੀ ਤਰ੍ਹਾਂ ਤਸੱਲੀ ਕਰੋ ਕਿ ਵਾਹਨ ਦੇ ਪਹੀਆਂ ਵਿਚ ਹਵਾ ਦਾ ਦਬਾਅ ਅਤੇ ਟੈਂਕੀ ਵਿਚ ਪੈਟਰੋਲ ਸਹੀ ਮਾਤਰਾ ਵਿਚ ਹੈ ਜਾਂ ਨਹੀਂ। ਦੋਵਾਂ ਵਿਚੋਂ ਕਿਸੇ ਵੀ ਇਕ ਚੀਜ਼ ਦੇ ਘੱਟ ਹੋਣ ਕਰਕੇ ਤੁਹਾਨੂੰ ਵਾਹਨ ਚਲਾਉਣ ਵਿਚ ਅਤੇ ਆਪਣੀ ਮੰਜ਼ਿਲ 'ਤੇ ਪੁੱਜਣ ਵਿਚ ਭਾਰੀ ਦਿੱਕਤ ਆ ਸਕਦੀ ਹੈ।
* ਅਕਸਰ ਵੇਖਿਆ ਗਿਆ ਹੈ ਕਿ ਤੇਜ਼ ਧੁੱਪ ਤੋਂ ਬਚਣ ਲਈ ਔਰਤਾਂ ਚਿਹਰੇ 'ਤੇ ਦੁਪੱਟਾ ਤੇ ਬਾਹਵਾਂ 'ਤੇ ਕਵਰ ਪਹਿਨਦੀਆਂ ਹਨ ਪਰ ਇਸ ਕਿਰਿਆ ਨੂੰ ਰੋਜ਼ ਦੀ ਆਦਤ ਬਣਾ ਲੈਣ ਨਾਲ ਸਥਿਤੀ ਕਈ ਵਾਰ ਉਸ ਵੇਲੇ ਹਾਸੋਹੀਣੀ ਬਣ ਜਾਂਦੀ ਹੈ ਜਦੋਂ ਔਰਤਾਂ ਸੁਹਾਵਣੇ ਤੇ ਬੱਦਲਵਾਈ ਵਾਲੇ ਮੌਸਮ ਵਿਚ ਵੀ ਆਦਤਨ ਇਹ ਸਾਰਾ ਕੁਝ ਪਹਿਨ ਕੇ ਚੱਲ ਪੈਂਦੀਆਂ ਹਨ ਤੇ ਵੇਖਣ ਵਾਲਿਆਂ ਲਈ ਮਜ਼ਾਕ ਦੀਆਂ ਪਾਤਰ ਬਣਦੀਆਂ ਹਨ। ਕਿਧਰੇ ਤੁਸੀਂ ਅਜਿਹਾ ਨਾ ਕਰ ਬੈਠੋ, ਇਸ ਗੱਲ ਦਾ ਜ਼ਰੂਰ ਖ਼ਿਆਲ ਰੱਖੋ।
* ਜੇਕਰ ਤੁਹਾਡੇ ਵਾਹਨ ਦਾ ਕੋਈ ਪੇਚ ਜਾਂ ਪੁਰਜ਼ਾ ਢਿੱਲਾ ਹੈ ਤੇ ਆਵਾਜ਼ ਕਰਦਾ ਹੈ ਤਾਂ ਉਸ ਨੂੰ ਠੀਕ ਕਰਵਾਉਣ ਪ੍ਰਤੀ ਅਣਗਹਿਲੀ ਨਾ ਵਰਤੋ। ਮਸ਼ੀਨਰੀ ਦੀ ਛੋਟੀ ਜਿਹੀ ਸਮੱਸਿਆ ਵੀ ਕਈ ਵਾਰੀ ਵੱਡੀ ਪ੍ਰੇਸ਼ਾਨੀ ਦਾ ਸਬੱਬ ਹੋ ਨਿਬੜਦੀ ਹੈ। ਆਪਣੇ ਵਾਹਨ ਨੂੰ ਧੋ ਕੇ ਜਾਂ ਧੁਆ ਕੇ ਤੇ ਸਦਾ ਸਾਫ਼-ਸੁਥਰਾ ਰੱਖੋ। ਬਰਸਾਤ ਦੇ ਮੌਸਮ ਵਿਚ ਰੇਨ ਕੋਟ ਅਤੇ ਨਿੱਕੀ ਛਤਰੀ ਆਪਣੇ ਵਾਹਨ ਦੀ ਡਿੱਕੀ ਵਿਚ ਜ਼ਰੂਰ ਰੱਖੋ।
* ਵਾਹਨ ਚਲਾਉਣ ਸਮੇਂ ਆਪਣਾ ਪਰਸ ਜਾਂ ਕੋਈ ਹੋਰ ਕੀਮਤੀ ਚੀਜ਼ ਮੋਢੇ 'ਤੇ ਜਾਂ ਪੈਰਾਂ ਵਿਚ ਨਾ ਰੱਖੋ। ਲੁਟੇਰਿਆਂ ਵਲੋਂ ਅਜਿਹੀਆਂ ਮਹਿਲਾਵਾਂ ਆਸਾਨੀ ਨਾਲ ਸ਼ਿਕਾਰ ਬਣਾ ਲਈਆਂ ਜਾਂਦੀਆਂ ਹਨ, ਜੋ ਅਜਿਹਾ ਕਰਦੀਆਂ ਹਨ। ਲੁੱਟ-ਖੋਹ ਦੀ ਘਟਨਾ ਵਾਪਰਨ ਸਮੇਂ ਵਾਹਨ ਨੂੰ ਰੋਕਣ ਦਾ ਯਤਨ ਕਰੋ ਤੇ ਚਲਦੇ ਵਾਹਨ 'ਤੇ ਲੁਟੇਰਿਆਂ ਨਾਲ ਸੰਘਰਸ਼ ਦੀ ਕੋਸ਼ਿਸ਼ ਨਾ ਕਰੋ, ਅਜਿਹਾ ਕਰਨ ਵਿਚ ਤੁਹਾਡੀ ਜਾਨ ਨੂੰ ਖ਼ਤਰਾ ਵੀ ਹੋ ਸਕਦਾ ਹੈ।
* ਵਾਹਨ 'ਤੇ ਆਪਣੇ ਪਿੱਛੇ ਜਾਂ ਅੱਗੇ ਛੋਟੇ ਬੱਚੇ ਨੂੰ ਬਿਠਾ ਕੇ ਚਲਾਉਣ ਸਮੇਂ ਪੂਰੀ ਸਾਵਧਾਨੀ ਵਰਤੋ, ਕਿਉਂਕਿ ਬੱਚੇ ਅਕਸਰ ਨਿਚੱਲੇ ਨਹੀਂ ਬੈਠਦੇ ਹਨ ਤੇ ਲਗਾਤਾਰ ਹਰਕਤ ਕਰਦੇ ਰਹਿੰਦੇ ਹਨ, ਜਿਸ ਨਾਲ ਤੁਹਾਡੇ ਵਾਹਨ ਦਾ ਸੰਤੁਲਨ ਵਿਗੜ ਸਕਦਾ ਹੈ। ਖ਼ਰੀਦਦਾਰੀ ਕਰਨ ਸਮੇਂ ਜੇਕਰ ਤੁਸੀਂ ਆਪ ਦੋਪਹੀਆ ਵਾਹਨ ਤੋਂ ਹੇਠਾਂ ਉਤਰ ਆਏ ਹੋ ਤਾਂ ਵਾਹਨ ਦਾ ਸਾਈਡ ਸਟੈਂਡ ਲਗਾ ਕੇ ਬੱਚੇ ਨੂੰ ਵਾਹਨ 'ਤੇ ਹੀ ਬੈਠਾ ਨਾ ਰਹਿਣ ਦਿਓ, ਕਿਉਂਕਿ ਸਟੈਂਡ ਖਿਸਕ ਜਾਣ ਦੀ ਸੂਰਤ ਵਿਚ ਬੱਚੇ ਨੂੰ ਵੱਡਾ ਨੁਕਸਾਨ ਪੁੱਜ ਸਕਦਾ ਹੈ।
* ਵਾਹਨ ਚਲਾਉਣ ਸਮੇਂ ਲੋੜੀਂਦੀਆਂ ਸਾਰੀਆਂ ਸਾਵਧਾਨੀਆਂ ਅਤੇ ਟ੍ਰੈਫ਼ਿਕ ਨੇਮਾਂ ਦੀ ਪੂਰੀ ਇਮਾਨਦਾਰੀ ਨਾਲ ਪਾਲਣਾ ਕਰੋ, ਕਿਉਂਕਿ ਜਾਨ ਹੈ ਤਾਂ ਜਹਾਨ ਹੈ।


-410, ਚੰਦਰ ਨਗਰ, ਬਟਾਲਾ। ਮੋਬਾ: 97816-46008


ਖ਼ਬਰ ਸ਼ੇਅਰ ਕਰੋ

ਗੋਰੇ ਗੋਰੇ ਮੁਖੜੇ 'ਤੇ ਕਾਲਾ-ਕਾਲਾ ਚਸ਼ਮਾ

ਧੁੱਪ ਚਸ਼ਮਾ ਖ਼ਰੀਦਣ ਸਮੇਂ ਕੁਝ ਜ਼ਰੂਰੀ ਨੁਕਤੇ

ਜੇਕਰ ਤੁਸੀਂ ਬਾਹਰ ਨਿਕਲਦੇ ਸਮੇਂ ਆਪਣੀਆਂ ਬੇਸ਼ਕੀਮਤੀ ਅੱਖਾਂ ਲਈ ਧੁੱਪ ਵਿਰੋਧੀ ਚਸ਼ਮੇ 'ਡਾਰਕ ਗਲਾਸਿਜ਼' ਦੀ ਵਰਤੋਂ ਕਰਦੇ ਹੋ ਤਾਂ ਜਿਥੇ ਤੇਜ਼-ਚੁੱਭਵੀਂ ਧੁੱਪ ਤੋਂ ਰਾਹਤ ਦਿਵਾ ਸਕੋਗੇ, ਉਥੇ ਹੀ ਤੁਹਾਡੀਆਂ ਅੱਖਾਂ ਨੂੰ ਇਕ ਤਰ੍ਹਾਂ ਦਾ ਸੁਰੱਖਿਆ ਕਵਚ ਵੀ ਮਿਲ ਜਾਂਦਾ ਹੈ। ਵੈਸੇ ਵੀ ਅੱਜਕਲ੍ਹ ਨੌਜਵਾਨਾਂ 'ਚ ਡਾਰਕ ਗਲਾਸਿਜ਼ ਪਹਿਨਣ ਦਾ ਰਿਵਾਜ ਵਧ ਰਿਹਾ ਹੈ। ਧੁੱਪ ਚਸ਼ਮਾ ਜਿਥੇ ਤੇਜ਼ ਧੁੱਪ ਦੀ ਚਮਕ, ਮਿੱਟੀ-ਘੱਟੇ, ਮੱਛਰ ਅਤੇ ਸੂਰਜ ਦੀ ਰੌਸ਼ਨੀ ਨਾਲ ਆ ਰਹੀਆਂ ਪਰਾਬੈਂਗਣੀ ਹਾਨੀਕਾਰਕ ਕਿਰਨਾਂ ਤੋਂ ਅੱਖਾਂ ਨੂੰ ਬਚਾਉਂਦਾ ਹੈ, ਉਥੇ ਹੀ ਤੁਹਾਡੇ ਰੂਪ 'ਚ ਵੀ ਨਿਖਾਰ ਲਿਆਉਂਦਾ ਹੈ। ਤੁਹਾਡੇ ਵਲੋਂ ਖਰੀਦਿਆ ਜਾ ਰਿਹਾ ਚਸ਼ਮਾ ਕਿਹੋ ਜਿਹਾ ਹੋਵੇ, ਇਸ ਲਈ ਕੁਝ ਜ਼ਰੂਰੀ ਨੁਕਤੇ ਗੌਰ-ਏ-ਨਜ਼ਰ ਕਰਨ ਦੀ ਲੋੜ ਹੈ।
* ਚਸ਼ਮੇ ਵਿਚ ਸਿਰਫ ਦੋ ਚੀਜ਼ਾਂ ਫਰੇਮ ਅਤੇ ਸ਼ੀਸ਼ੇ ਹੁੰਦੇ ਹਨ, ਜਿਨ੍ਹਾਂ ਦੀ ਸਹੀ ਪਰਖ ਕਰ ਲੈਣੀ ਚਾਹੀਦੀ ਹੈ। ਧਿਆਨ ਨਾਲ ਦੇਖ ਲਵੋ ਕਿ ਫਰੇਮ ਅਤੇ ਸ਼ੀਸ਼ਿਆਂ 'ਤੇ ਕਿਸੇ ਕਿਸਮ ਦਾ ਦਾਗ ਜਾਂ ਖਰੋਚ ਵਗੈਰਾ ਨਾ ਹੋਵੇ।
* ਫਰੇਮ ਕਿਤਿਓਂ ਵੀ ਚੁੱਭਦਾ ਨਾ ਹੋਵੇ, ਕਿਉਂਕਿ ਚੁੱਭਣ ਵਾਲੀ ਥਾਂ 'ਤੇ ਡੂੰਘ ਦਾ ਨਿਸ਼ਾਨ ਪੈਣ ਸਦਕਾ ਚਿਹਰਾ ਓਪਰਾ ਜਾਂ ਭੱਦਾ ਲਗਦਾ ਹੈ। ਫਰੇਮ ਕੰਨਾਂ ਅਤੇ ਨੱਕ 'ਤੇ ਸਹੀ ਫਿੱਟ ਹੋਵੇ। ਤੰਗ ਫਰੇਮ ਨਾਲ ਸਿਰਦਰਦ ਅਤੇ ਢਿੱਲੇ ਫਰੇਮ ਨੂੰ ਵਾਰ-ਵਾਰ ਉੱਪਰ ਖਿਸਕਾਉਣਾ ਪੈਂਦਾ ਹੈ। ਅਕਸਰ ਫਰੇਮ ਪਤਲਾ ਹੀ ਸਹੀ ਰਹਿੰਦਾ ਹੈ, ਕਿਉਂਕਿ ਮੋਟੇ ਫਰੇਮ ਸਦਕਾ ਜਿਥੇ ਦ੍ਰਿਸ਼ਟੀ ਖੇਤਰ ਘਟਦਾ ਹੈ, ਉਥੇ ਹੀ ਭਾਰਾ-ਭਾਰਾ ਵੀ ਮਹਿਸੂਸ ਹੁੰਦਾ ਰਹਿੰਦਾ ਹੈ। ਕਈਆਂ ਨੂੰ ਧਾਤ ਦਾ ਫਰੇਮ ਪਹਿਨਣ ਨਾਲ ਅਲਰਜੀ ਹੁੰਦੀ ਹੈ, ਇਸ ਤੋਂ ਬਚਣ ਲਈ ਪਲਾਸਟਿਕ ਫਰੇਮ ਹੀ ਪਸੰਦ ਕਰੋ।
* ਸਨ-ਗਲਾਸਿਜ਼ ਕਦੇ ਵੀ ਫੁੱਟਪਾਥ ਜਾਂ ਚਲਦੇ-ਫਿਰਦੇ ਰੇੜ੍ਹੀ-ਫੜ੍ਹੀਆਂ ਵਾਲਿਆਂ ਤੋਂ ਨਾ ਖ਼ਰੀਦੋ, ਕਿਉਂਕਿ ਘਟੀਆ ਕਿਸਮ ਅਤੇ ਸਸਤਾ ਚਸ਼ਮਾ ਤੁਹਾਡੀਆਂ ਅੱਖਾਂ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ।
* ਅਕਸਰ ਬਰਫ, ਰੇਤ, ਸਮੁੰਦਰ ਸਤ੍ਹਾ, ਕੰਕਰੀਟ ਦੀਆਂ ਇਮਾਰਤਾਂ ਅਤੇ ਉਨ੍ਹਾਂ 'ਤੇ ਫਿੱਟ ਸ਼ੀਸ਼ਿਆਂ ਤੋਂ ਵੀ ਸੂਰਜੀ ਪ੍ਰਕਾਸ਼ ਦੀਆਂ ਕਿਰਨਾਂ ਪ੍ਰਵਰਤਿਤ ਹੋ ਕੇ ਸਿੱਧੀਆਂ ਸਾਡੀਆਂ ਅੱਖਾਂ ਨੂੰ ਚੁੰਧਿਆਉਂਦੀਆਂ ਹਨ, ਜਿਨ੍ਹਾਂ ਤੋਂ ਬਚਣ ਲਈ ਅੱਖਾਂ ਦੇ ਮਾਹਿਰ ਪੋਲੇਰਾਈਜ਼ਡ ਲੈੱਨਜ਼ ਯੁਕਤ ਚਸ਼ਮੇ ਦੀ ਸਲਾਹ ਦਿੰਦੇ ਹਨ।
* ਚਸ਼ਮਾ ਖਰੀਦਣ ਸਮੇਂ ਜੇ ਕੋਈ ਤੁਹਾਡੀ ਸਹੇਲੀ, ਦੋਸਤ ਜਾਂ ਕੋਈ ਹੋਰ ਤੁਹਾਡੇ ਨਾਲ ਹੋਵੇ ਤਾਂ ਠੀਕ ਹੋਵੇਗਾ, ਕਿਉਂਕਿ ਉਹ ਸਹੀ-ਸਹੀ ਅੰਦਾਜ਼ਾ ਲਗਾ ਕੇ ਸੁਝਾਅ ਸਕਦਾ ਹੈ ਕਿ ਤੁਹਾਡੇ ਚਿਹਰੇ ਉੱਪਰ ਕਿਹੜੇ ਰੰਗ, ਡਿਜ਼ਾਈਨ ਦਾ ਫਰੇਮ ਅਤੇ ਸ਼ੀਸ਼ਿਆਂ ਵਾਲਾ ਚਸ਼ਮਾ ਫੱਬਦਾ ਹੈ।
* ਇਸ ਤੋਂ ਇਲਾਵਾ ਵਨ-ਵੇ-ਗਲਾਸ ਭਾਵ ਸਿਰਫ ਅੰਦਰੋਂ ਬਾਹਰ ਦੇਖ ਸਕਣ ਵਾਲਾ ਗਲਾਸ ਵੀ ਸਹੀ ਰਹਿੰਦਾ ਹੈ, ਕਿਉਂਕਿ ਅਜਿਹੇ ਗਲਾਸ ਪ੍ਰਕਾਸ਼ ਦੀਆਂ ਕਿਰਨਾਂ ਨੂੰ ਪ੍ਰਵਰਤਿਤ ਕਰਨ ਦੇ ਨਾਲ-ਨਾਲ ਪਰਾਬੈਂਗਣੀ ਕਿਰਨਾਂ ਨੂੰ ਵੀ ਸੋਖ ਲੈਂਦੇ ਹਨ।
* ਚਸ਼ਮਾ ਉਤਾਰਨ ਤੋਂ ਬਾਅਦ ਹਮੇਸ਼ਾ ਸਾਫ਼ ਕਰਕੇ ਹੀ ਕੇਸ 'ਚ ਰੱਖੋ। ਜੇ ਕੋਈ ਦਾਗ-ਧੱਬਾ ਲੱਗ ਗਿਆ ਹੋਵੇ ਤਾਂ ਚਸ਼ਮੇ ਨੂੰ ਪਾਣੀ ਨਾਲ ਧੋ ਕੇ ਮੁਲਾਇਮ ਕੱਪੜੇ ਨਾਲ ਸਾਫ਼ ਕਰੋ। ਚਸ਼ਮਾ ਕਦੇ ਵੀ ਲਾਪ੍ਰਵਾਹੀ ਨਾਲ ਇਧਰ-ਉਧਰ ਨਾ ਰੱਖਿਆ ਜਾਵੇ, ਨਹੀਂ ਤਾਂ ਸ਼ੀਸ਼ਿਆਂ ਉੱਪਰ ਖਰੋਚਾਂ ਪੈਣ ਅਤੇ ਟੁੱਟਣ ਦਾ ਵੀ ਡਰ ਰਹਿੰਦਾ ਹੈ।


-ਮਸੀਤਾਂ ਰੋਡ, ਕੋਟ ਈਸੇ ਖਾਂ, ਜ਼ਿਲ੍ਹਾ ਮੋਗਾ। ਮੋਬਾ: 70870-48140

ਕਿਵੇਂ ਕਰੀਏ ਫੇਸ਼ੀਅਲ

ਜਵਾਨੀ ਵਿਚ ਪੈਰ ਰੱਖਦੇ ਹੀ ਮੁਟਿਆਰਾਂ ਆਪਣੀ ਸੁੰਦਰਤਾ 'ਤੇ ਬਹੁਤ ਜ਼ਿਆਦਾ ਧਿਆਨ ਦੇਣ ਲਗਦੀਆਂ ਹਨ। ਆਪਣੇ ਚਿਹਰੇ ਨੂੰ ਆਕਰਸ਼ਕ ਅਤੇ ਸੁੰਦਰ ਬਣਾਉਣ ਲਈ ਉਹ ਜ਼ਿਆਦਾ ਮੇਕਅੱਪ ਅਤੇ ਤਰ੍ਹਾਂ-ਤਰ੍ਹਾਂ ਦੇ ਪ੍ਰਸਾਧਨਾਂ ਦੀ ਵਰਤੋਂ ਕਰਨ ਲਗਦੀਆਂ ਹਨ। ਨਤੀਜੇ ਵਜੋਂ ਚਿਹਰੇ ਦੇ ਰੋਮ ਬੰਦ ਹੋ ਜਾਂਦੇ ਹਨ ਅਤੇ ਚਿਹਰੇ ਦੀ ਅਸਲੀ ਸੁੰਦਰਤਾ ਵੀ ਖ਼ਤਮ ਹੋ ਜਾਂਦੀ ਹੈ।
ਇਸ ਆਕਰਸ਼ਣ ਨੂੰ ਵਾਪਸ ਲਿਆਉਣ ਲਈ ਫੇਸ਼ੀਅਲ ਆਦਿ ਕਰਵਾਇਆ ਜਾਂਦਾ ਹੈ। ਫੇਸ਼ੀਅਲ ਕਰਵਾਉਣ ਲਈ ਬਿਊਟੀ ਪਾਰਲਰ ਜਾਣਾ ਅੱਜਕਲ੍ਹ ਦੀ ਮਹਿੰਗਾਈ ਵਿਚ ਸਾਰਿਆਂ ਲਈ ਅਸਾਨ ਨਹੀਂ ਹੈ। ਆਓ ਅਸੀਂ ਘਰ ਵਿਚ ਹੀ ਫੇਸ਼ੀਅਲ ਕਰ ਲਈਏ ਅਤੇ ਪੈਸਿਆਂ ਦੀ ਬੱਚਤ ਕਰੀਏ। ਫੇਸ਼ੀਅਲ ਦਾ ਮਤਲਬ ਹੈ ਚਿਹਰੇ ਦੀ ਚੰਗੀ ਤਰ੍ਹਾਂ ਸਫ਼ਾਈ, ਜਿਸ ਨਾਲ ਸਾਡੇ ਬੰਦ ਰੋਮ ਖੁੱਲ੍ਹ ਜਾਣ। ਫੇਸ਼ੀਅਲ ਹਮੇਸ਼ਾ ਚਮੜੀ 'ਤੇ ਕੀਤਾ ਜਾਂਦਾ ਹੈ, ਇਸ ਲਈ ਸਭ ਤੋਂ ਪਹਿਲਾਂ ਕਲੀਜ਼ਿੰਗ ਮਿਲਕ ਜਾਂ ਕੱਚੇ ਦੁੱਧ ਨਾਲ ਚਿਹਰੇ ਨੂੰ ਸਾਫ਼ ਕਰੋ। ਚਮੜੀ ਤੇਲੀ ਹੋਣ 'ਤੇ ਸਾਬਣ ਨਾਲ ਮੂੰਹ ਨੂੰ ਧੋ ਲਓ।
ਹੁਣ ਚਿਹਰੇ 'ਤੇ ਮਾਲਿਸ਼ ਕਰੋ। ਧਿਆਨ ਰਹੇ ਕਿ ਕ੍ਰੀਮ ਆਪਣੀ ਚਮੜੀ ਅਨੁਸਾਰ ਹੀ ਲਓ। ਰੁੱਖੀ ਚਮੜੀ ਲਈ ਕੋਲਡ ਕ੍ਰੀਮ ਅਤੇ ਤੇਲੀ ਚਮੜੀ ਲਈ ਚਿਕਨਾਈ ਵਾਲੀ ਕ੍ਰੀਮ ਨਾ ਲਓ। ਹਲਕੇ ਹੱਥਾਂ ਨਾਲ ਮਾਲਿਸ਼ ਕਰਨੀ ਸ਼ੁਰੂ ਕਰੋ। ਮਾਲਿਸ਼ ਹਮੇਸ਼ਾ ਅੰਦਰੋਂ ਬਾਹਰ ਵੱਲ ਨੂੰ ਅਤੇ ਹੇਠੋਂ ਉੱਪਰ ਵੱਲ ਨੂੰ ਕਰੋ। ਅੱਖਾਂ ਦੇ ਕੋਲ ਹਲਕੇ ਹੱਥਾਂ ਨਾਲ ਕ੍ਰੀਮ ਲਗਾਓ। 15-20 ਮਿੰਟ ਤੱਕ ਮਾਲਿਸ਼ ਕਰੋ ਤਾਂ ਕਿ ਕ੍ਰੀਮ ਚਮੜੀ ਵਿਚ ਜਜ਼ਬ ਹੋ ਜਾਏ।
ਮਾਲਿਸ਼ ਦੀ ਪ੍ਰਕਿਰਿਆ ਤੋਂ ਬਾਅਦ ਆਪਣੇ ਚਿਹਰੇ ਨੂੰ ਭਾਫ ਦਿਓ। ਭਾਫ ਦੇਣ ਲਈ ਕਿਸੇ ਖੁੱਲ੍ਹੇ ਭਾਂਡੇ ਵਿਚ ਗਰਮ ਪਾਣੀ ਪਾਓ ਅਤੇ ਚਿਹਰੇ ਨੂੰ ਦੋਵੇਂ ਪਾਸਿਆਂ ਤੋਂ ਤੌਲੀਏ ਨਾਲ ਢਕ ਕੇ ਭਾਫ ਲਓ। ਇਸ ਤੋਂ ਬਾਅਦ ਸੁਕਾ ਲਓ।
ਅੰਤਿਮ ਦੌਰ ਵਿਚ ਚਿਹਰੇ 'ਤੇ ਪੈਕ ਲਗਾਓ। ਪੈਕ ਪੂਰੀ ਤਰ੍ਹਾਂ ਸੁੱਕਣ 'ਤੇ ਹੀ ਸਾਫ਼ ਕਰੋ। ਚਿਹਰੇ 'ਤੇ ਜਦੋਂ ਪੈਕ ਲੱਗਾ ਹੋਵੇ ਤਾਂ ਨਾ ਤਾਂ ਹੱਸੋ ਅਤੇ ਨਾ ਹੀ ਕਿਸੇ ਨਾਲ ਗੱਲਾਂ ਕਰੋ। ਅਜਿਹਾ ਕਰਨ ਨਾਲ ਝੁਰੜੀਆਂ ਪੈਣ ਦਾ ਡਰ ਰਹਿੰਦਾ ਹੈ। ਪੈਕ ਸੁੱਕਣ 'ਤੇ ਪਾਣੀ ਨਾਲ ਚਿਹਰਾ ਸਾਫ਼ ਕਰੋ। ਤੁਹਾਡੇ ਚਿਹਰੇ 'ਤੇ ਅਦਭੁੱਤ ਨਿਖਾਰ ਆਵੇਗਾ।


-ਸ਼ੈਲੀ ਮਾਥੁਰ

ਲੋਹੇ ਦੇ ਭਾਂਡਿਆਂ 'ਤੇ ਜੰਗਾਲ ਤੋਂ ਬਚਾਅ ਕਰੋ

* ਲੋਹੇ ਦੀ ਛੁਰੀ ਜਾਂ ਕਾਂਟੇ ਨੂੰ ਵਰਤਣ ਤੋਂ ਬਾਅਦ ਧੋ ਕੇ, ਸੁਕਾ ਕੇ ਰੱਖੋ, ਕਿਉਂਕਿ ਉਨ੍ਹਾਂ 'ਤੇ ਲੱਗਿਆ ਥੋੜ੍ਹਾ ਵੀ ਜੰਗਾਲ ਸਿਹਤ ਲਈ ਖ਼ਤਰਨਾਕ ਹੋ ਸਕਦਾ ਹੈ। * ਬਰਸਾਤ ਦੇ ਦਿਨਾਂ ਵਿਚ ਲੋਹੇ ਦੀ ਛੁਰੀ ਅਤੇ ਕਾਂਟੇ 'ਤੇ ਸਰ੍ਹੋਂ ਦਾ ਤੇਲ ਲਗਾ ਕੇ ਰੱਖੋ। ਜੰਗਾਲ ਨਜ਼ਰ ਆਉਣ 'ਤੇ ਕੱਚਾ ਆਲੂ ਮਲੋ। * ਲੋਹੇ ਦੇ ਭਾਂਡਿਆਂ ਨੂੰ ਜੰਗਾਲ ਤੋਂ ਬਚਾਉਣ ਲਈ ਭਾਂਡਿਆਂ 'ਤੇ ਚੂਨੇ ਦਾ ਲੇਪ ਵੀ ਇਕ ਕਾਰਗਰ ਉਪਾਅ ਹੈ।
* ਜੋ ਭਾਂਡੇ ਖਾਣਾ ਬਣਾਉਂਦੇ ਸਮੇਂ ਵਰਤੋਂ ਵਿਚ ਨਾ ਆਉਂਦੇ ਹੋਣ, ਉਨ੍ਹਾਂ ਨੂੰ ਮਿੱਟੀ ਦਾ ਤੇਲ ਜਾਂ ਗ੍ਰੀਸ ਲਗਾ ਕੇ ਰੱਖੋ।
* ਗਰਮ ਪਾਣੀ ਵਿਚ ਗੰਧਕ ਦਾ ਅਮਲ ਮਿਲਾ ਕੇ ਉਸ ਨੂੰ ਇੱਟ ਨਾਲ ਜਾਂ ਕਿਸੇ ਖੁਰਦਰੀ ਚੀਜ਼ ਨਾਲ ਰਗੜਨ 'ਤੇ ਵੀ ਲੋਹੇ ਦਾ ਜੰਗਾਲ ਦੂਰ ਹੋ ਜਾਂਦਾ ਹੈ। * ਹਰ ਰੋਜ਼ ਵਰਤੋਂ ਵਿਚ ਆਉਣ ਵਾਲੇ ਭਾਂਡਿਆਂ ਨੂੰ ਸਹਿਜੇ ਕੀਤੇ ਜੰਗਾਲ ਨਹੀਂ ਲਗਦਾ। ਇਸੇ ਲਈ ਰੋਜ਼ ਵਰਤੋਂ ਨਾ ਹੋਣ ਵਾਲੇ ਭਾਂਡਿਆਂ ਨੂੰ ਧੋ ਕੇ, ਸੁਕਾ ਕੇ ਹੀ ਰੱਖੋ। ਧਿਆਨ ਰੱਖੋ ਕਿ ਉਹ ਜਗ੍ਹਾ ਸਿੱਲ੍ਹ ਵਾਲੀ ਨਾ ਹੋਵੇ। * ਸੋਡੀਅਮ ਸਿਲੀਕੇਟ ਨੂੰ ਥੋੜ੍ਹਾ ਜਿਹਾ ਭਾਂਡੇ ਧੋਣ ਵਾਲੇ ਪਾਣੀ ਵਿਚ ਮਿਲਾਉਣ ਨਾਲ ਵੀ ਜੰਗਾਲ ਦੂਰ ਹੁੰਦਾ ਹੈ।
* ਹਮਾਮਦਸਤਾ ਵਰਗੇ ਕਦੇ-ਕਦੇ ਵਰਤੋਂ ਵਿਚ ਆਉਣ ਵਾਲੇ ਭਾਂਡਿਆਂ 'ਤੇ ਸਰ੍ਹੋਂ ਦਾ ਤੇਲ ਲਗਾ ਕੇ ਰੱਖੋ।
* ਜੰਗਾਲ ਦੇ ਦਾਗ ਜੇ ਜ਼ਿਆਦਾ ਗੂੜ੍ਹੇ ਹੋਣ ਤਾਂ ਭਾਂਡੇ ਨੂੰ ਪੈਰਾਫਿਨ ਦੇ ਤੇਲ ਵਿਚ ਡੁਬੋ ਕੇ ਰੱਖੋ। ਫਿਰ ਜੰਗਾਲ ਲੱਥਣ ਤੋਂ ਬਾਅਦ ਉਸੇ ਸਟੀਲਵੂਲ ਜਾਂ ਇਮਰੀ ਪੇਪਰ ਨਾਲ ਰਗੜ ਦਿਓ ਪਰ ਅਜਿਹੇ ਭਾਂਡਿਆਂ ਨੂੰ ਵਰਤੋਂ ਵਿਚ ਨਾ ਲਿਆਓ, ਕਿਉਂਕਿ ਜੰਗਾਲ ਦੇ ਕਣ ਤੁਹਾਡੀ ਸਿਹਤ 'ਤੇ ਬੁਰਾ ਅਸਰ ਪਾ ਸਕਦੇ ਹਨ। * ਢੱਕਣ ਵਾਲੇ ਭਾਂਡੇ ਨੂੰ ਢਕ ਕੇ ਨਾ ਰੱਖੋ ਪਰ ਢੱਕਣ ਅਜਿਹੀ ਜਗ੍ਹਾ ਰੱਖੋ, ਜਿਥੋਂ ਤੁਸੀਂ ਅਸਾਨੀ ਨਾਲ ਵਾਪਸ ਲੈ ਸਕੋ।


-ਮੌ: ਅਹਤਸ਼ਾਮ ਅਲੀ 'ਸ਼ਾਦ'

ਚਲੋ ਚਲੀਏ ਰਾਜਸਥਾਨ

ਗੱਟੇ ਦੀ ਸਬਜ਼ੀ

ਸਮੱਗਰੀ : 1 ਕਟੋਰੀ ਬੇਸਣ, ਮੋਇਨ ਦੇ ਲਈ 1 ਵੱਡਾ ਚਮਚ ਤੇਲ, ਪੀਸੀ ਹੋਈ ਲਾਲ ਮਿਰਚ-ਧਨੀਆ, ਹਲਦੀ, ਨਮਕ, ਜੀਰਾ, ਹਿੰਗ ਅਤੇ ਥੋੜ੍ਹਾ ਜਿਹਾ ਸਾਬਤ ਧਨੀਆ, ਇਕ ਕਟੋਰੀ ਖੱਟਾ ਦਹੀਂ, ਦੋ ਵੱਡੇ ਚਮਚ ਘਿਓ, ਕੱਟਿਆ ਹੋਇਆ ਬਰੀਕ ਧਨੀਆ ਅਤੇ ਹਰੀ ਮਿਰਚ।
ਵਿਧੀ : ਬੇਸਣ ਵਿਚ ਤੇਲ, ਥੋੜ੍ਹੀ ਪੀਸੀ ਹੋਈ ਲਾਲ ਮਿਰਚ, ਹਲਦੀ, ਨਮਕ ਅਤੇ ਸਾਬਤ ਧਨੀਏ ਦੇ ਦੋ ਟੁਕੜੇ ਕਰਕੇ ਉਸ ਵਿਚ ਪਾ ਕੇ ਚੰਗੀ ਤਰ੍ਹਾਂ ਮਿਲਾ ਲਓ। ਫਿਰ ਗਰਮ ਪਾਣੀ ਨਾਲ ਪੂੜੀ ਦੇ ਆਟੇ ਵਾਂਗ ਗੁੰਨ੍ਹ ਲਓ।
ਇਕ ਪਤੀਲੇ ਵਿਚ ਗਰਮ ਪਾਣੀ ਕਰ ਲਓ। ਫਿਰ ਆਟੇ ਦੇ ਲੰਬੇ ਰੋਲ ਬਣਾ ਕੇ ਪਾਣੀ ਵਿਚ ਉਬਾਲਣ ਲਈ ਰੱਖ ਦਿਓ। ਉਨ੍ਹਾਂ ਨੂੰ ਉਦੋਂ ਤੱਕ ਉਬਲਣ ਦਿਓ ਜਦੋਂ ਤੱਕ ਉਹ ਚੰਗੀ ਤਰ੍ਹਾਂ ਉਬਲ ਨਾ ਜਾਣ। ਉਬਲਣ ਤੋਂ ਬਾਅਦ ਉਨ੍ਹਾਂ ਨੂੰ ਕੱਢ ਕੇ ਉਨ੍ਹਾਂ ਨੂੰ ਛੋਟੇ-ਛੋਟੇ ਟੁਕੜਿਆਂ ਵਿਚ ਕੱਟ ਲਓ। ਬਚਿਆ ਹੋਇਆ ਪਾਣੀ ਰਹਿਣ ਦਿਓ।
ਗੱਟੇ ਦਾ ਝੋਲ ਬਣਾਉਣ ਲਈ ਦਹੀਂ ਵਿਚ ਲਾਲ ਮਿਰਚ-ਧਨੀਆ ਪਾਊਡਰ, ਹਲਦੀ ਅਤੇ ਸਵਾਦ ਅਨੁਸਾਰ ਨਮਕ ਪਾ ਕੇ ਚੰਗੀ ਤਰ੍ਹਾਂ ਮਿਲਾ ਲਓ। ਪਤੀਲੇ ਵਿਚ ਘਿਓ ਗਰਮ ਕਰ ਲਓ। ਫਿਰ ਹਿੰਗ, ਜੀਰਾ ਅਤੇ ਕੜੀਪੱਤਾ ਪਾ ਕੇ ਦਹੀਂ ਉਸ ਵਿਚ ਪਾ ਦਿਓ। ਦਹੀਂ ਨੂੰ ਉਦੋਂ ਤੱਕ ਪਕਾਓ ਜਦੋਂ ਤੱਕ ਉਹ ਘਿਓ ਨਾ ਛੱਡ ਦੇਵੇ। ਜਦੋਂ ਘਿਓ ਛੱਡ ਦੇਵੇ ਤਾਂ ਉਬਲੇ ਹੋਏ ਗੱਟਿਆਂ ਦਾ ਬਚਿਆ ਹੋਇਆ ਪਾਣੀ ਉਸ ਵਿਚ ਪਾ ਦਿਓ। ਲੋੜ ਅਨੁਸਾਰ ਪਾਣੀ ਹੋਰ ਵੀ ਪਾ ਸਕਦੇ ਹੋ।
ਜਦੋਂ ਉਬਾਲਾ ਆ ਜਾਵੇ ਤਾਂ ਟੁਕੜੇ ਕੀਤੇ ਹੋਏ ਗੱਟੇ ਉਸ ਵਿਚ ਪਾਓ ਅਤੇ ਉਬਾਲ ਆਉਣ ਦਿਓ। ਫਿਰ ਬਰੀਕ ਕੱਟਿਆ ਹੋਇਆ ਧਨੀਆ-ਹਰੀ ਮਿਰਚ ਮਿਲਾ ਲਓ। ਇਸ ਤਰ੍ਹਾਂ ਗੱਟੇ ਦੀ ਸਬਜ਼ੀ ਤਿਆਰ ਹੈ।


-ਸ਼ਵੇਤਾ ਮੰਗਲ

ਬੱਚਿਆਂ ਨੂੰ ਸਿਖਾਓ ਨੈਤਿਕ ਕਦਰਾਂ-ਕੀਮਤਾਂ ਦਾ ਮਹੱਤਵ

ਬਹੁਤ ਸਾਰੇ ਬੱਚਿਆਂ ਵਿਚ ਸਬਰ, ਸੰਤੋਖ ਅਤੇ ਸਹਿਣਸ਼ੀਲਤਾ ਵਰਗੇ ਨੈਤਿਕ ਗੁਣ ਖ਼ਤਮ ਹੁੰਦੇ ਜਾ ਰਹੇ ਹਨ। ਇਸ ਤਰ੍ਹਾਂ ਦੇ ਬੱਚੇ ਪਰਿਵਾਰ, ਸਮਾਜ ਅਤੇ ਦੇਸ਼ ਲਈ ਬਹੁਤ ਵੱਡੀ ਸਮੱਸਿਆ ਬਣ ਰਹੇ ਹਨ। ਜੇ ਉਨ੍ਹਾਂ ਦੀ ਛੋਟੀ ਜਿਹੀ ਗੱਲ ਨਾ ਮੰਨੀ ਜਾਵੇ ਜਾਂ ਕੋਈ ਗ਼ਲਤ ਕੰਮ ਕਰਨ ਤੋਂ ਰੋਕਿਆ ਜਾਵੇ ਤਾਂ ਉਸ ਦਾ ਕਾਰਨ ਜਾਣੇ ਬਿਨਾਂ ਆਪਾ ਖੋ ਦਿੰਦੇ ਹਨ। ਕਈ ਵਾਰ ਬੇਸਮਝੀ ਵਿਚ ਇਸ ਤਰ੍ਹਾਂ ਦੇ ਕਦਮ ਚੁੱਕ ਲੈਂਦੇ ਹਨ, ਜਿਸ ਦਾ ਹਰਜਾਨਾ ਉਨ੍ਹਾਂ ਨੂੰ ਅਤੇ ਪਰਿਵਾਰ ਨੂੰ ਸਾਰੀ ਉਮਰ ਭੁਗਤਣਾ ਪੈਂਦਾ ਹੈ। ਸੋਸ਼ਲ ਮੀਡੀਆ ਵੀ ਉਨ੍ਹਾਂ ਦੇ ਜੀਵਨ ਵਿਚ ਅਹਿਮ ਭੂਮਿਕਾ ਨਿਭਾ ਰਿਹਾ ਹੈ, ਜਿਸ ਕਾਰਨ ਉਹ ਪਰਿਵਾਰ ਨਾਲ ਘੱਟ ਤੇ ਸੋਸ਼ਲ ਸਾਈਟਸ ਨਾਲ ਜ਼ਿਆਦਾ ਜੁੜੇ ਰਹਿੰਦੇ ਹਨ। ਮੋਬਾਈਲ, ਵੱਟਸਐਪ, ਫੇਸਬੁੱਕ ਦਾ ਜ਼ਰੂਰਤ ਤੋਂ ਜ਼ਿਆਦਾ ਇਸਤੇਮਾਲ ਉਨ੍ਹਾਂ ਨੂੰ ਸਮੇਂ ਤੋਂ ਪਹਿਲਾਂ ਸੁਪਨੇ ਦਿਖਾਉਣੇ ਸ਼ੁਰੂ ਕਰ ਦਿੰਦਾ ਹੈ, ਜਿਨ੍ਹਾਂ ਨੂੰ ਉਹ ਮਿਹਨਤ ਦੀ ਬਜਾਏ ਗ਼ਲਤ ਤਰੀਕਿਆਂ ਨਾਲ ਰਾਤੋ-ਰਾਤ ਪੂਰਾ ਕਰਨਾ ਚਾਹੁੰਦੇ ਹਨ। ਇਸ ਤਰ੍ਹਾਂ ਦੇ ਬੱਚੇ ਅਕਸਰ ਕੁਰਾਹੇ ਪੈ ਜਾਂਦੇ ਹਨ। ਅਜੋਕੇ ਸਮੇਂ ਵਿਚ ਮਾਂ-ਬਾਪ ਦੀ ਖਾਸ ਜ਼ਿੰਮੇਵਾਰੀ ਬਣਦੀ ਹੈ ਕਿ ਸ਼ੁਰੂ ਤੋਂ ਹੀ ਸਬਰ ਰੱਖਣਾ ਅਤੇ ਸੰਤੋਖ ਵਿਚ ਰਹਿਣਾ ਸਿਖਾਉਣ। ਪੜ੍ਹਾਉਣ ਦੇ ਸਮੇਂ ਮਾਂ-ਬਾਪ ਨੂੰ ਇਹ ਕਦਰਾਂ-ਕੀਮਤਾਂ ਨੂੰ ਧਿਆਨ ਵਿਚ ਰੱਖਣਾ ਚਾਹੀਦਾ ਹੈ, ਕਿਉਂਕਿ ਅੱਜ ਬੱਚੇ ਪੜ੍ਹਦੇ ਸਮੇਂ ਬੜੇ ਦਬਾਅ ਵਿਚ ਰਹਿੰਦੇ ਹਨ। ਹਰ ਮਾਂ-ਬਾਪ ਉਨ੍ਹਾਂ ਨੂੰ ਨੰਬਰ ਵਨ 'ਤੇ ਦੇਖਣਾ ਚਾਹੁੰਦੇ ਹਨ। ਜਦੋਂ ਬੱਚੇ ਦੇ ਨੰਬਰ ਦੂਜਿਆਂ ਨਾਲੋਂ ਘੱਟ ਆਉਂਦੇ ਹਨ ਤਾਂ ਉਨ੍ਹਾਂ ਕੋਲੋਂ ਸਹਿਣ ਨਹੀਂ ਹੁੰਦਾ। ਉਸ ਦੀ ਤੁਲਨਾ ਬਾਕੀ ਬੱਚਿਆਂ ਨਾਲ ਕਰਦੇ ਹੋਏ ਬੁਰਾ-ਭਲਾ ਕਹਿਣ ਲੱਗ ਜਾਂਦੇ ਹਨ। ਇਸ ਸਮੇਂ ਅਸੀਂ ਭੁੱਲ ਜਾਂਦੇ ਹਾਂ ਕਿ ਜਦੋਂ ਸਾਰੇ ਮਾਂ-ਬਾਪ ਇਕ ਵਰਗੇ ਨਹੀਂ ਹੁੰਦੇ ਤਾਂ ਉਨ੍ਹਾਂ ਦੇ ਬੱਚੇ ਇਕ ਵਰਗੇ ਕਿਸ ਤਰ੍ਹਾਂ ਹੋ ਸਕਦੇ ਹਨ? ਇਸ ਲਈ ਆਪਣੇ ਬੱਚਿਆਂ ਦੀ ਤੁਲਨਾ ਕਦੇ ਵੀ ਦੂਜੇ ਬੱਚਿਆਂ ਨਾਲ ਨਾ ਕਰੋ, ਹਰ ਬੱਚੇ ਵਿਚ ਅਲੱਗ-ਅਲੱਗ ਕਲਾ ਛੁਪੀ ਹੁੰਦੀ ਹੈ, ਮਾਂ-ਬਾਪ ਨੂੰ ਉਸ ਨੂੰ ਪਹਿਚਾਨਣ ਦੀ ਲੋੜ ਹੈ।
ਸਿਰਫ ਮਾਂ-ਬਾਪ ਬਣਨਾ ਹੀ ਜ਼ਰੂਰੀ ਨਹੀਂ ਹੁੰਦਾ, ਬਲਕਿ ਜ਼ਿੰਮੇਵਾਰ ਮਾਂ-ਬਾਪ ਬਣਨਾ ਜ਼ਰੂਰੀ ਹੁੰਦਾ ਹੈ। ਉਨ੍ਹਾਂ ਦਾ ਬਚਪਨ ਮਾਂ-ਬਾਪ ਦੇ ਹੱਥ ਵਿਚ ਹੁੰਦਾ ਹੈ। ਮਾਂ-ਬਾਪ ਜਿਸ ਤਰ੍ਹਾਂ ਦੇ ਰੰਗ ਉਨ੍ਹਾਂ ਦੇ ਜੀਵਨ ਵਿਚ ਭਰ ਦੇਣਗੇ, ਉਹ ਉਸ ਤਰ੍ਹਾਂ ਦੇ ਮਾਡਲ ਬਣ ਜਾਣਗੇ। ਇਥੇ ਮਾਂ-ਬਾਪ ਨੂੰ ਇਕ ਮਿਸਾਲ ਬਣਨਾ ਪਵੇਗਾ, ਕਿਉਂਕਿ ਬੱਚੇ ਨਸੀਹਤ ਨਾਲੋਂ ਜ਼ਿਆਦਾ ਉਨ੍ਹਾਂ ਦੇ ਰੋਜ਼ਾਨਾ ਵਿਵਹਾਰ ਤੋਂ ਸਿੱਖਦੇ ਹਨ। ਮਾਂ-ਬਾਪ ਨੂੰ ਕਦੇ ਵੀ ਬੱਚਿਆਂ ਸਾਹਮਣੇ ਛੋਟੀ-ਛੋਟੀ ਗੱਲ 'ਤੇ ਲੜਨਾ ਨਹੀਂ ਚਾਹੀਦਾ। ਨਾ ਹੀ ਹਮੇਸ਼ਾ ਇਕ-ਦੂਜੇ ਨੂੰ ਨੀਵਾਂ ਦਿਖਾਉਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਦੀ ਹਾਜ਼ਰੀ ਵਿਚ ਬਜ਼ੁਰਗਾਂ ਨੂੰ ਵੀ ਬੁਰਾ-ਭਲਾ ਨਹੀਂ ਕਹਿਣਾ ਚਾਹੀਦਾ। ਆਪਣੀ ਆਮਦਨ ਅਨੁਸਾਰ ਖਰਚ ਕਰਨਾ ਚਾਹੀਦਾ ਹੈ। ਬੱਚਿਆਂ ਦੀਆਂ ਮੁਢਲੀਆਂ ਜ਼ਰੂਰਤਾਂ ਜ਼ਰੂਰ ਪੂਰੀਆਂ ਕਰੋ ਪਰ ਸਹੂਲਤਾਂ ਅਤੇ ਖਾਹਿਸ਼ਾਂ ਸੋਚ-ਸਮਝ ਕੇ। ਸੋਸ਼ਲ ਸਟੇਟਸ ਦੀ ਖਾਤਰ ਕਦੇ ਵੀ ਕਰਜ਼ਦਾਰ ਨਾ ਬਣੋ, ਸਹੂਲਤਾਂ ਦੀ ਜਗ੍ਹਾ ਉਨ੍ਹਾਂ ਨੂੰ ਸੰਸਕਾਰ ਦਿਓ, ਜਿਹੜੇ ਸਾਰਾ ਜੀਵਨ ਉਨ੍ਹਾਂ ਦੇ ਕੰਮ ਆਉਣਗੇ। ਹਰ ਕੰਮ ਧੀਰਜ ਨਾਲ ਕਰਨ ਦੀ ਆਦਤ ਪਾਈਏ। ਜੇ ਕੁਝ ਉਸੇ ਸਮੇਂ ਨਾ ਮਿਲੇ ਤਾਂ ਸਹਿਣਸ਼ੀਲਤਾ ਤੋਂ ਕੰਮ ਲੈਣ। ਆਉਣ ਵਾਲੇ ਸਮੇਂ ਵਿਚ ਇਹ ਕਦਰਾਂ-ਕੀਮਤਾਂ ਬੱਚਿਆਂ ਨੂੰ ਜੀਵਨ ਰੂਪੀ ਇਮਾਰਤ ਬਣਾਉਣ ਵਿਚ ਅਹਿਮ ਭੂਮਿਕਾ ਨਿਭਾਉਣਗੀਆਂ।
ਇਨ੍ਹਾਂ ਕਦਰਾਂ-ਕੀਮਤਾਂ ਦੀ ਸਵਾਰੀ ਕਰਨ ਵਾਲਾ ਮਨੁੱਖ ਨਾ ਕਿਸੇ ਦੇ ਕਦਮਾਂ ਵਿਚ ਅਤੇ ਨਾ ਕਿਸੇ ਦੀਆਂ ਨਜ਼ਰਾਂ ਵਿਚੋਂ ਡਿਗਦਾ ਹੈ। ਜਦੋਂ ਬੱਚਿਆਂ ਦਾ ਮਨ ਸਬਰ-ਸੰਤੋਖ ਤੇ ਸਹਿਣਸ਼ੀਲਤਾ ਦੀ ਨੀਂਹ 'ਤੇ ਟਿਕ ਜਾਂਦਾ ਹੈ ਤਾਂ ਉਸ ਸਮੇਂ ਉਸ ਨੂੰ ਪੈਰ ਧਰਤੀ 'ਤੇ, ਨਜ਼ਰਾਂ ਅਸਮਾਨ ਵਿਚ ਟਿਕਾਉਣੀਆਂ ਆ ਜਾਂਦੀਆਂ ਹਨ। ਉਨ੍ਹਾਂ ਨੂੰ ਸਮਝ ਆ ਜਾਂਦੀ ਹੈ ਕਿ ਮਿਹਨਤ, ਪਿਆਰ, ਸਤਿਕਾਰ, ਲਗਨ ਦਾ ਆਧਾਰ ਸਬਰ ਤੇ ਸੰਤੋਖ ਹਨ। ਗੁੱਸੇ ਦੀ ਅੱਗ ਵਿਚ ਸਬਰ ਦਾ ਇਕ ਪਲ ਮੁਸੀਬਤ ਦੇ ਹਜ਼ਾਰਾਂ ਪਲਾਂ ਨੂੰ ਬਚਾਉਣ ਵਿਚ ਸਾਡੀ ਮਦਦ ਕਰਦਾ ਹੈ। ਬੱਚਿਆਂ ਨੂੰ ਨੈਤਿਕਤਾ ਸਿਖਾਉਣ ਦਾ ਮਤਲਬ ਘਰ ਵਿਚ ਇਕ ਸੰਸਥਾ ਬਣਾਉਣ ਦੇ ਬਰਾਬਰ ਹੈ।
ਸੰਸਕਾਰੀ ਬੱਚੇ ਸਮਾਜ ਦੀ ਪੂੰਜੀ ਹੁੰਦੇ ਹਨ। ਉਹ ਹੀ ਸਮਾਜ ਉੱਨਤੀ ਦੇ ਸਿਖਰਾਂ ਨੂੰ ਛੂੰਹਦਾ ਹੈ, ਜਿਸ ਦੀ ਯੁਵਾ ਪੀੜ੍ਹੀ ਨੈਤਿਕਤਾ 'ਤੇ ਚੱਲ ਕੇ ਸਮਾਜ ਲਈ ਕਲਿਆਣਕਾਰੀ ਕੰਮ ਕਰਦੀ ਹੈ। ਇਸ ਤਰ੍ਹਾਂ ਦੇ ਬੱਚੇ ਹਮੇਸ਼ਾ ਆਤਮਵਿਸ਼ਵਾਸੀ ਹੁੰਦੇ ਹਨ ਅਤੇ ਦੂਜਿਆਂ ਦੀ ਵੀ ਮਦਦ ਕਰਨ ਲਈ ਹਮੇਸ਼ਾ ਤਿਆਰ ਰਹਿੰਦੇ ਹਨ। ਮਾਂ-ਬਾਪ ਦੁਆਰਾ ਬਚਪਨ ਵਿਚ ਸਿਖਾਇਆ ਨੈਤਿਕਤਾ ਦਾ ਪਾਠ ਸਾਰੀ ਉਮਰ ਉਨ੍ਹਾਂ ਨੂੰ ਅਗਾਂਹਵਧੂ ਬਣਾਉਂਦਾ ਹੈ। ਇਸ ਤਰ੍ਹਾਂ ਦੇ ਬੱਚੇ ਹੀ ਅੱਗੇ ਜਾ ਕੇ ਸਮਾਜ ਸੁਧਾਰਕ ਅਤੇ ਮਹਾਨ ਨੇਤਾ ਬਣਦੇ ਹਨ। ਸਾਨੂੰ ਸਭ ਨੂੰ ਸਮਝਣਾ ਚਾਹੀਦਾ ਹੈ ਕਿ ਸੰਤੋਖ ਕਿਸੇ ਵੀ ਤਾਕਤ ਨਾਲੋਂ ਜ਼ਿਆਦਾ ਸ਼ਕਤੀਸ਼ਾਲੀ ਹੁੰਦਾ ਹੈ ਅਤੇ ਸਬਰ ਸੁੰਦਰਤਾ ਤੋਂ ਮਹਾਨ ਹੁੰਦਾ ਹੈ। ਬੱਚਿਆਂ ਨੂੰ ਅਸੀਂ ਚਾਹੇ ਅਮੀਰ ਨਾ ਬਣਾ ਸਕੀਏ ਪਰ ਉਨ੍ਹਾਂ ਨੂੰ ਸੰਸਕਾਰਾਂ, ਕਦਰਾਂ-ਕੀਮਤਾਂ ਨਾਲ ਜ਼ਰੂਰ ਅਮੀਰ ਬਣਾ ਦਈਏ, ਉਹ ਆਪਣੇ ਅਮੀਰ ਹੋਣ ਦੇ ਰਸਤੇ ਆਪ ਬਣਾ ਲੈਣਗੇ।

-ਮੋਬਾ: 98782-49944

ਅੱਜ ਰੱਖੜੀ 'ਤੇ ਵਿਸ਼ੇਸ਼

ਭੈਣ-ਭਰਾ ਦੇ ਨਿੱਘੇ ਰਿਸ਼ਤੇ ਦੀ ਵਿਸ਼ੇਸ਼ ਝਲਕ ਰੱਖੜੀ

ਇਕ ਮਾਂ ਦੇ ਜਾਏ ਭੈਣ-ਭਰਾ ਦਾ ਰਿਸ਼ਤਾ ਬਹੁਤ ਵੱਖਰੀ ਤਰ੍ਹਾਂ ਦਾ ਹੁੰਦਾ ਹੈ। ਇਸ ਰਿਸ਼ਤੇ ਵਿਚ ਪਿਆਰ ਦੇ ਨਾਲ ਹੀ ਤਕਰਾਰ ਦੀ ਨੋਕ-ਝੋਕ ਵੀ ਘੁਲੀ-ਮਿਲੀ ਹੁੰਦੀ ਹੈ। ਭੈਣ-ਭਰਾ ਵਿਚ ਬਚਪਨ ਤੋਂ ਲੈ ਕੇ ਖੱਟੀਆਂ-ਮਿੱਠੀਆਂ ਯਾਦਾਂ ਸਾਨੂੰ ਸਾਰੀ ਉਮਰ ਯਾਦ ਰਹਿੰਦੀਆਂ ਹਨ। ਭੈਣ ਆਪਣੇ ਭਰਾ ਦੀ ਸਫਲਤਾ ਵੇਖਦਿਆਂ ਖੁਸ਼ੀ ਵਿਚ ਫੁੱਲਿਆ ਨਹੀਂ ਸਮਾਉਂਦੀ। ਇਸੇ ਤਰ੍ਹਾਂ ਹੀ ਭੈਣ ਦੀ ਡੋਲੀ ਵਾਲੇ ਦਿਨ ਭਰਾ ਦੀਆਂ ਅੱਖਾਂ 'ਚੋਂ ਨਿਕਲ ਰਹੇ ਆਪਮੁਹਾਰੇ ਹੰਝੂ ਬਿਨਾਂ ਬੋਲਿਆਂ ਬਹੁਤ ਕੁਝ ਕਹਿ ਜਾਂਦੇ ਹਨ। ਹਰ ਇਕ ਭੈਣ ਨੂੰ ਹਰੇਕ ਸਾਲ ਇਕ ਵਿਸ਼ੇਸ਼ ਦਿਨ ਰੱਖੜੀ ਦੇ ਤਿਉਹਾਰ ਦਾ ਇੰਤਜ਼ਾਰ ਹੁੰਦਾ ਹੈ ਅਤੇ ਅੱਜ ਉਹ ਦਿਨ ਆ ਗਿਆ। ਇਸ ਦਿਨ ਭੈਣ ਬੜੇ ਹੀ ਚਾਵਾਂ ਅਤੇ ਦਿਲ ਦੀਆਂ ਸੱਧਰਾਂ ਨਾਲ ਆਪਣੇ ਭਰਾ ਨੂੰ ਸੱਚੇ ਦਿਲ ਤੇ ਪ੍ਰੇਮ ਭਾਵਨਾ ਨਾਲ ਰੱਖੜੀ ਬੰਨ੍ਹਦੀ ਹੈ। ਇਸ ਦਿਨ ਸਹੁਰੇ ਘਰੋਂ ਆਉਣ ਵਾਲੀ ਭੈਣ ਦੀ ਉਡੀਕ ਪੇਕੇ ਘਰ ਵਿਚ ਬੇਸਬਰੀ ਨਾਲ ਕੀਤੀ ਜਾਂਦੀ ਹੈ। ਭੈਣਾਂ ਆਪਣੇ ਭਰਾਵਾਂ ਦੇ ਗੁੱਟ 'ਤੇ ਰੱਖੜੀ ਬੰਨ੍ਹ ਕੇ ਪਰਮਾਤਮਾ ਪਾਸੋਂ ਆਪਣੇ ਭਰਾਵਾਂ ਲਈ ਲੰਬੀ ਉਮਰ ਦੀ ਕਾਮਨਾ ਕਰਦੀਆਂ ਥੱਕਦੀਆਂ ਨਹੀਂ ਅਤੇ ਭਰਾ ਵਲੋਂ ਭੈਣ ਨੂੰ ਆਦਰ-ਸਤਿਕਾਰ ਨਾਲ ਪਿਆਰ ਭਰਿਆ ਭੈਣ ਦੇ ਮਨ-ਪਸੰਦ ਦਾ ਤੋਹਫ਼ਾ ਦਿੱਤਾ ਜਾਂਦਾ ਹੈ। ਸਾਰੇ ਪਰਿਵਾਰ ਵਲੋਂ ਭੈਣ-ਭਰਾ ਦੇ ਪਿਆਰ ਦੀ ਝਲਕ ਨੂੰ ਬੜੇ ਸਤਿਕਾਰ ਨਾਲ ਵੇਖਿਆ ਜਾਂਦਾ ਹੈ।
ਇਸ ਤਿਉਹਾਰ ਵਿਚੋਂ ਭੈਣ-ਭਰਾ ਦੇ ਪਿਆਰ ਦੀ ਇਕ ਵਿਸ਼ੇਸ਼ ਝਲਕ ਨਜ਼ਰ ਆਉਂਦੀ ਹੈ। ਇਸ ਮੌਕੇ ਮਾਤਾ-ਪਿਤਾ ਆਪਣੇ ਬੱਚਿਆਂ ਦੇ ਖੁਸ਼ੀਆਂ ਭਰੇ ਮਾਹੌਲ ਨੂੰ ਵੇਖਦੇ ਹੋਏ ਫੁੱਲਿਆਂ ਨਹੀਂ ਸਮਾਉਂਦੇ। ਰੱਖੜੀ ਦਾ ਤਿਉਹਾਰ ਭੈਣ-ਭਰਾ ਨੂੰ ਮਿਲਾਉਣ ਵਾਲਾ ਇਕੋ-ਇਕ ਵਿਸ਼ੇਸ਼ ਤਿਉਹਾਰ ਮੰਨਿਆ ਜਾਂਦਾ ਹੈ। ਖਾਸ ਕਰਕੇ ਰੱਖੜੀ 'ਤੇ ਭੈਣ-ਭਰਾ ਦਾ ਰਿਸ਼ਤਾ ਇਕ ਮਿਸਾਲ ਬਣਦਾ ਹੈ। ਕਿਸੇ ਵੇਲੇ ਮਾੜੀ-ਮੋਟੀ ਹੋਈ ਨੋਕ-ਝੋਕ ਵੀ ਇਸ ਤਿਉਹਾਰ 'ਤੇ ਭੈਣ-ਭਰਾ ਦੇ ਆਪਸੀ ਪਿਆਰ ਵਿਚ ਬਦਲ ਜਾਂਦੀ ਹੈ। ਜਿਨ੍ਹਾਂ ਭੈਣਾਂ ਦੇ ਵੀਰ ਨਹੀਂ ਹੁੰਦੇ, ਇਸ ਦਿਨ ਉਨ੍ਹਾਂ ਦੀਆਂ ਅੱਖਾਂ ਵਿਚੋਂ ਨਿਕਲ ਰਹੇ ਆਪਮੁਹਾਰੇ ਅੱਥਰੂ ਨਹੀ ਸੁੱਕਦੇ ਅਤੇ ਉਹ ਰੱਬ ਨੂੰ ਉਲਾਂਭੇ ਦਿੰਦੀਆਂ ਵੀ ਥੱਕਦੀਆਂ ਨਹੀਂ ਕਿ 'ਰੱਬਾ, ਸਾਨੂੰ ਵੀ ਜੇ ਇਕ ਵੀਰ ਦੇ ਦਿੰਦਾ ਤਾਂ ਤੇਰੇ ਘਰ ਕਿਹੜਾ ਘਾਟਾ ਪੈ ਜਾਣਾ ਸੀ?' ਜਿਸ ਭਰਾ ਦੇ ਭੈਣ ਨਹੀਂ ਹੁੁੰਦੀ, ਉਹ ਵੀ ਇਸ ਦਿਨ ਆਪਣੇ-ਆਪ ਨੂੰ ਇਕੱਲਾ ਮਹਿਸੂਸ ਕਰਦਾ ਹੈ। ਜੇਕਰ ਇਸ ਤਿਉਹਾਰ ਦੀ ਮਹੱਤਤਾ ਨੂੰ ਹਰੇਕ ਭਰਾ ਸਮਝੇ ਤਾਂ ਭਰੂਣਹੱਤਿਆ ਦਾ ਖਾਤਮਾ ਕਰਨਾ ਬੜਾ ਆਸਾਨ ਹੈ ਅਤੇ ਨਾ ਹੀ ਕੋਈ ਭਰਾ-ਭੈਣ ਦੇ ਪਿਆਰ ਭਰੇ ਸਤਿਕਾਰ ਨਾਲ ਆਪਣੇ ਗੁੱਟ 'ਤੇ ਰੱਖੜੀ ਤੋਂ ਵਾਂਝਾ ਰਹੇ। ਹਰੇਕ ਘਰ ਪਰਿਵਾਰ ਵਿਚ ਇਹ ਤਿਉਹਾਰ ਬੜੀ ਧੂਮ-ਧਾਮ ਨਾਲ ਮਨਾਇਆ ਜਾ ਸਕਦਾ ਹੈ।


-ਪਿੰਡ ਨਥਾਣਾ, ਜ਼ਿਲ੍ਹਾ ਬਠਿੰਡਾ-151102. ਮੋਬਾ: 94170-79435
ਮੇਲ :jivansidhus@ gmail.com

ਜ਼ਿੰਦਗੀ ਦੀ ਕਿਤਾਬ ਨੂੰ ਪੜ੍ਹਨਾ ਸਿੱਖੋ

ਸਾਡੇ ਸਾਰਿਆਂ ਲਈ ਜ਼ਿੰਦਗੀ ਇਕ ਸਮਾਂ ਹੈ ਅਤੇ ਅਸੀਂ ਇਸ ਸਮੇਂ ਨੂੰ ਕਿਵੇਂ ਵਰਤਣਾ ਹੈ, ਇਹ ਸਾਡੇ 'ਤੇ ਨਿਰਭਰ ਕਰਦਾ ਹੈ। ਨਿਰਾਸ਼ਾਵਾਦੀ ਨੂੰ ਹਰ ਮੌਕੇ ਵਿਚ ਮੁਸ਼ਕਿਲ ਨਜ਼ਰ ਆਉਂਦੀ ਹੈ ਅਤੇ ਆਸ਼ਾਵਾਦੀ ਨੂੰ ਹਰ ਮੁਸ਼ਕਿਲ ਵਿਚ ਇਕ ਮੌਕਾ ਦਿਖਾਈ ਦਿੰਦਾ ਹੈ। ਅਕਸਰ ਗ਼ਲਤੀਆਂ ਨੂੰ ਸਵੀਕਾਰ ਕਰਨ ਦੀ ਹਿੰਮਤ ਤੇ ਗ਼ਲਤ ਨੂੰ ਗ਼ਲਤ ਕਹਿਣ ਦਾ ਹੌਸਲਾ ਸਾਨੂੰ ਜ਼ਿੰਦਗੀ ਵਿਚ ਅੱਗੇ ਲਿਜਾਂਦਾ ਹੈ। ਆਪਣੇ-ਆਪ ਵਿਚ ਹਰ ਵਿਅਕਤੀ ਦੀ ਜ਼ਿੰਦਗੀ ਹੀ ਖੁੱਲ੍ਹੀ ਕਿਤਾਬ ਦੀ ਤਰ੍ਹਾਂ ਹੈ ਪਰ ਉਨ੍ਹਾਂ ਲਈ ਇਹ ਕਿਤਾਬ ਕਿਸੇ ਕੰਮ ਨਹੀਂ, ਜੋ ਇਸ ਜ਼ਿੰਦਗੀ ਰੂਪੀ ਕਿਤਾਬ ਨੂੰ ਪੜ੍ਹਨਾ ਨਹੀਂ ਜਾਣਦੇ। ਕਹਿੰਦੇ ਹਨ ਕਿ ਬੀਤਿਆ ਸਮਾਂ ਇਕ ਰੱਦੀ ਪੇਪਰ ਦੀ ਤਰ੍ਹਾਂ ਹੁੰਦਾ ਹੈ, ਵਰਤਮਾਨ ਸਮਾਂ ਨਿਊਜ਼ ਪੇਪਰ ਦੀ ਤਰ੍ਹਾਂ ਅਤੇ ਆਉਣ ਵਾਲਾ ਸਮਾਂ ਪ੍ਰਸ਼ਨ-ਪੱਤਰ ਦੀ ਤਰ੍ਹਾਂ ਹੁੰਦਾ ਹੈ। ਇਸ ਪ੍ਰਸ਼ਨ-ਪੱਤਰ ਨੂੰ ਧਿਆਨ ਨਾਲ ਪੜ੍ਹੋ ਅਤੇ ਸੁਚੇਤ ਹੋ ਕੇ ਲਿਖੋ, ਨਹੀਂ ਤਾਂ ਇਹ ਪ੍ਰਸ਼ਨ-ਪੱਤਰ ਇਕ ਟਿਸ਼ੂ ਪੇਪਰ ਬਣ ਕੇ ਰਹਿ ਜਾਵੇਗਾ। ਕਿਸੇ ਵੀ ਸਮੱਸਿਆ ਨੂੰ ਗ਼ਲਤ ਤਰੀਕੇ ਨਾਲ ਹੱਲ ਕਰਨ ਦਾ ਯਤਨ ਕਰਨਾ ਹੀ ਸਭ ਤੋਂ ਵੱਡੀ ਸਮੱਸਿਆ ਹੈ। ਕੋਈ ਕਿਸ ਤਰ੍ਹਾਂ ਮਰਦਾ ਹੈ, ਇਸ ਨਾਲੋਂ ਇਹ ਜ਼ਿਆਦਾ ਮਹੱਤਵਪੂਰਨ ਹੈ ਕਿ ਕੋਈ ਕਿਸ ਤਰ੍ਹਾਂ ਜਿਉਂਦਾ ਹੈ।
ਅਸੀਂ ਸਿਰਫ ਉਸੇ ਨੂੰ ਹੀ ਜਾਣਦੇ ਹਾਂ ਜੋ ਗੁਆਚਿਆ ਹੁੰਦਾ ਹੈ। ਅਸੀਂ ਉਸ ਨੂੰ ਖੋਜਣ ਦੀ ਕਦੇ ਕੋਸ਼ਿਸ਼ ਨਹੀਂ ਕਰਦੇ, ਜਿਸ ਨੂੰ ਅਜੇ ਤੱਕ ਅਸੀਂ ਜਾਣ ਨਹੀਂ ਸਕੇ। ਅਕਸਰ ਛੋਟੀਆਂ-ਛੋਟੀਆਂ ਗੱਲਾਂ ਮਿਲ ਕੇ ਵੱਡੀ ਤਾਕਤ ਬਣਦੀਆਂ ਹਨ। ਇਕ ਬੁਰੀ ਆਦਤ ਅੱਗੇ ਅਨੇਕਾਂ ਬੁਰੀਆਂ ਆਦਤਾਂ ਨੂੰ ਜਨਮ ਦਿੰਦੀ ਹੈ। ਜੇਕਰ ਨਜ਼ਰੀਆ ਜਾਂ ਦ੍ਰਿਸ਼ਟੀਕੋਣ ਬਦਸੂਰਤ ਤਾਂ ਸਭ ਕੁਝ ਬਦਸੂਰਤ ਹੀ ਨਜ਼ਰ ਆਵੇਗਾ ਅਤੇ ਜੇਕਰ ਨਜ਼ਰੀਆ ਜਾਂ ਦ੍ਰਿਸ਼ਟੀਕੋਣ ਖੂਬਸੂਰਤ ਹੋਵੇਗਾ ਤਾਂ ਸਭ ਕੁਝ ਖੂਬਸੂਰਤ ਹੀ ਨਜ਼ਰ ਆਵੇਗਾ। ਉਹ ਵਿਅਕਤੀ ਦੂਜਿਆਂ ਨੂੰ ਕਦੇ ਦੁੱਖ ਨਹੀਂ ਦੇ ਸਕਦਾ, ਜੋ ਦੂਜਿਆਂ ਦੇ ਦੁੱਖ ਨੂੰ ਮਹਿਸੂਸ ਕਰਦਾ ਹੈ। ਦੂਜਿਆਂ ਦੇ ਮੂੰਹੋਂ ਆਪਣੀ ਪ੍ਰਸੰਸਾ ਸੁਣਨ ਦੀ ਆਦਤ ਅਸਲ ਵਿਚ ਤੁਹਾਡਾ ਸਮਾਂ ਹੀ ਖਰਾਬ ਕਰਦੀ ਹੈ। ਜੋ ਵਿਅਕਤੀ ਦੂਜਿਆਂ ਨਾਲੋਂ ਆਪਣੇ-ਆਪ ਨੂੰ ਵੱਧ ਸਿਆਣਾ ਸਮਝਦਾ ਹੈ, ਉਹ ਵਿਅਕਤੀ ਅਸਲ ਵਿਚ ਮੂਰਖ ਹੁੰਦਾ ਹੈ। ਮੂਰਖ ਨਾਲ ਬਹਿਸ ਕਰਨ ਵਾਲਾ ਵਿਅਕਤੀ ਮੂਰਖ ਹੀ ਹੁੰਦਾ ਹੈ। ਆਪਣੇ ਔਗੁਣਾਂ 'ਤੇ ਤੁਸੀਂ ਜਿੰਨਾ ਵੀ ਵੱਧ ਪਰਦਾ ਪਾਉਣ ਦੀ ਕੋਸ਼ਿਸ਼ ਕਰਦੇ ਹੋ, ਉਹ ਔਗੁਣ ਓਨੇ ਹੀ ਤੁਹਾਨੂੰ ਵੱਧ ਨੰਗਾ ਕਰਦੇ ਹਨ। ਗ਼ਲਤੀਆਂ ਕਰਨ ਨਾਲ ਅਸੀਂ ਘੱਟ ਅਤੇ ਗ਼ਲਤੀਆਂ ਬਾਰੇ ਸੋਚ-ਸੋਚ ਕੇ ਅਸੀਂ ਜ਼ਿਆਦਾ ਦੁਖੀ ਹੁੰਦੇ ਹਾਂ।
ਕਈ ਲੜਕੀਆਂ ਅਕਸਰ ਆਪਣੇ ਘੁਮੰਡ ਦੇ ਪਰਦੇ ਵਿਚ ਰਹਿੰਦੀਆਂ ਹਨ ਅਤੇ ਉਨ੍ਹਾਂ ਨੂੰ ਆਪਣੀ ਅਸਲ ਸਮਰੱਥਾ ਦਾ ਨਾ ਗਿਆਨ ਹੁੰਦਾ ਹੈ ਅਤੇ ਨਾ ਹੀ ਉਹ ਇਸ ਨੂੰ ਗੰਭੀਰਤਾ ਨਾਲ ਸਮਝਣ ਦੀ ਕੋਸ਼ਿਸ਼ ਕਰਦੀਆਂ ਹਨ। ਉਹ ਸਮੇਂ ਤੋਂ ਪਹਿਲਾਂ ਸਫਲਤਾ ਦੀਆਂ ਪੌੜੀਆਂ 'ਤੇ ਚੜ੍ਹਨ ਦੀ ਕੋਸ਼ਿਸ਼ ਕਰਦੀਆਂ ਹਨ। ਮੁਕਾਬਲੇ ਵਿਚ ਹਿੱਸਾ ਲੈਣ ਦੀ ਬਜਾਏ ਉਹ ਅਸਿੱਧੇ ਰਸਤੇ ਰਾਹੀਂ ਮੰਜ਼ਿਲਾਂ 'ਤੇ ਪਹੁੰਚਣ ਦੀ ਕੋਸ਼ਿਸ਼ ਕਰਦੀਆਂ ਹਨ ਅਤੇ ਇਸੇ ਕੋਸ਼ਿਸ਼ ਵਿਚ ਉਹ ਕਈ ਵਾਰ ਖੁਦ ਨੂੰ ਗੁਆ ਲੈਂਦੀਆਂ ਹਨ। ਮਿਹਨਤ ਕਰੋ ਪਰ ਸਬਰ ਵੀ ਰੱਖੋ। ਰਸਤਾ ਬਦਲੋ ਪਰ ਇਰਾਦਾ ਨਹੀਂ। ਕਾਮਯਾਬੀ ਦੇ ਰਸਤੇ ਸਾਰਿਆਂ ਲਈ ਇਕੋ ਜਿਹੇ ਨਹੀਂ ਹੁੰਦੇ। ਆਪਣੇ-ਆਪ ਵਿਚ ਉਹ ਵਿਅਕਤੀ ਕਦੇ ਵੀ ਸੰਤੁਸ਼ਟ ਨਹੀਂ ਹੁੰਦਾ, ਜਿਸ ਕੋਲ ਜ਼ਿੰਦਗੀ ਦੇ ਅਸੂਲ ਜਾਂ ਨਿਯਮ ਨਹੀਂ ਹੁੰਦੇ। ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਾ ਡਰਾਈਵਰ ਹਾਦਸਿਆਂ ਤੋਂ ਬਚ ਨਹੀਂ ਸਕਦਾ।
ਤੁਹਾਡੀ ਜ਼ਿੰਦਗੀ ਦੇ ਸਿਰਫ 2 ਦਿਨ ਹੀ ਖਾਸ ਹੁੰਦੇ ਹਨ। ਇਕ ਉਹ ਦਿਨ ਜਿਸ ਦਿਨ ਤੁਹਾਡਾ ਜਨਮ ਹੋਇਆ ਅਤੇ ਇਕ ਉਹ ਦਿਨ ਜਿਸ ਦਿਨ ਤੁਸੀਂ ਇਹ ਸਮਝ ਗਏ ਕਿ ਤੁਹਾਡਾ ਜਨਮ ਕਿਸ ਮਕਸਦ ਲਈ ਹੋਇਆ। ਆਪਣੇ-ਆਪ ਨੂੰ ਸਮਝਣਾ ਅਸਲ ਵਿਚ ਆਪਣੇ-ਆਪ ਨੂੰ ਪੜ੍ਹਨਾ ਹੀ ਹੁੰਦਾ ਹੈ। ਨਿਰਸੰਦੇਹ ਅਸੀਂ ਆਪਣੀ ਜ਼ਿੰਦਗੀ ਦਾ ਜ਼ਿਆਦਾ ਸਮਾਂ ਆਪਣੇ-ਆਪ ਨਾਲ ਹੀ ਗੁਜ਼ਾਰਦੇ ਹਾਂ, ਇਸ ਲਈ ਆਪਣੇ-ਆਪ ਨਾਲ ਚੰਗੀ ਤਰ੍ਹਾਂ ਰਹਿਣਾ ਸਿੱਖੋ। ਆਪਣੀ ਜ਼ਿੰਦਗੀ ਦੀ ਕਿਤਾਬ ਨੂੰ ਖੁਦ ਪੜ੍ਹਨਾ ਅਤੇ ਖੁਦ ਸਿਰਜਣਾ ਸਿੱਖੋ। ਗ਼ਲਤ-ਫ਼ਹਿਮੀ ਗ਼ਲਤੀ ਤੋਂ ਵੀ ਵੱਧ ਨੁਕਸਾਨਦੇਹ ਹੈ। ਆਪਣੀਆਂ ਗ਼ਲਤੀਆਂ ਨੂੰ ਨਜ਼ਰਅੰਦਾਜ਼ ਕਰਨਾ ਸਾਡੀ ਸਭ ਤੋਂ ਵੱਡੀ ਗ਼ਲਤੀ ਹੈ। ਮੁਸ਼ਕਿਲਾਂ ਸਾਨੂੰ ਸਾਡੀ ਸਮਰੱਥਾ ਦਾ ਗਿਆਨ ਕਰਵਾਉਣ ਲਈ ਆਉਂਦੀਆਂ ਹਨ। ਕਿਸੇ ਵੀ ਮੁਸ਼ਕਿਲ ਦੇ ਸਹੀ ਹੱਲ ਬਾਰੇ ਸੋਚਣਾ ਆਪਣੇ ਰਸਤੇ ਨੂੰ ਪੱਧਰਾ ਕਰਨ ਵਾਂਗ ਹੈ। ਜ਼ਿੰਦਗੀ ਦੇ ਸਬਕ ਸਿਖਾਏ ਨਹੀਂ ਜਾਂਦੇ, ਸਗੋਂ ਖੁਦ ਸਿੱਖਣੇ ਪੈਂਦੇ ਹਨ। ਹੰਝੂਆਂ ਦਾ ਮੁਕਾਬਲਾ ਕਰਨ ਵਾਲੀ ਮੁਸਕਰਾਹਟ ਸਭ ਤੋਂ ਵੱਧ ਸੁੰਦਰ ਹੁੰਦੀ ਹੈ। ਮੁਸੀਬਤਾਂ ਦਾ ਮੁਕਾਬਲਾ ਕਰਨ ਵਾਲੀ ਹਿੰਮਤ ਸਭ ਤੋਂ ਵੱਧ ਮਜ਼ਬੂਤ ਹੁੰਦੀ ਹੈ। ਦਰਦ ਨੂੰ ਖਿੜੇ ਮੱਥੇ ਸਹਿਣ ਕਰਨ ਵਾਲੀ ਸਮਰੱਥਾ ਨੂੰ ਕੋਈ ਹਰਾ ਨਹੀਂ ਸਕਦਾ। ਤੁਸੀਂ ਕਦੇ ਵੀ ਖੁਸ਼ ਨਹੀਂ ਰਹਿ ਸਕਦੇ, ਜੇਕਰ ਤੁਸੀਂ ਸੋਚਦੇ ਹੋ ਕਿ ਲੋਕ ਕੀ ਕਹਿਣਗੇ।


-ਪਿੰਡ ਗੋਲੇਵਾਲਾ (ਫ਼ਰੀਦਕੋਟ)। ਮੋਬਾ: 94179-49079

ਰੱਖੜੀ 'ਤੇ ਸੁੰਦਰਤਾ ਟਿਪਸ

ਇਸ ਸਾਲ ਰੱਖੜੀ ਦਾ ਤਿਉਹਾਰ 15 ਅਗਸਤ ਨੂੰ ਮਨਾਇਆ ਜਾ ਰਿਹਾ ਹੈ, ਜਿਸ ਨਾਲ ਇਸ ਤਿਉਹਾਰ ਦੀ ਮਹੱਤਤਾ ਹੋਰ ਵੀ ਜ਼ਿਆਦਾ ਵਧ ਗਈ ਹੈ। ਇਸ ਦਿਨ ਭੈਣਾਂ ਦਾ ਸਜਣਾ-ਸੰਵਰਨਾ ਤਾਂ ਬਣਦਾ ਹੀ ਹੈ। ਇਸ ਪਵਿੱਤਰ ਦਿਨ 'ਤੇ ਆਕਰਸ਼ਕ ਅਤੇ ਮਨਮੋਹਕ ਦਿਸਣ ਲਈ ਤੁਸੀਂ ਚਟਕੀਲੇ ਰੰਗ ਵਾਲੇ ਰਾਇਲ ਬਲੂ, ਲਾਲ, ਗੁਲਾਬੀ ਜਾਂ ਮੈਰੂਨ ਰੰਗ ਦੇ ਕੱਪੜੇ ਜਾਂ ਸਾਦਾ ਲਿਬਾਸ ਦੋਵੇਂ ਹੀ ਪਹਿਨ ਸਕਦੇ ਹੋ ਪਰ ਮੌਸਮ ਮੁਤਾਬਿਕ ਤੁਹਾਨੂੰ ਗਲੈਮਰਸ ਜਾਂ ਸਟਾਈਲਿਸ਼ ਦਿੱਖ ਪਾਉਣ ਲਈ ਕੁਝ ਘਰੇਲੂ ਨੁਸਖਿਆਂ ਦੀ ਮਦਦ ਲੈਣੀ ਪਵੇਗੀ। ਬਰਸਾਤ ਦੇ ਮੌਸਮ ਵਿਚ ਮਨਾਏ ਜਾਣ ਵਾਲੇ ਇਸ ਤਿਉਹਾਰ ਵਿਚ ਚਮੜੀ ਨੂੰ ਚਮਕਦੀ ਅਤੇ ਆਕਰਸ਼ਕ ਬਣਾਉਣ ਲਈ ਤੁਹਾਨੂੰ ਤਿਉਹਾਰ ਤੋਂ ਇਕ ਹਫ਼ਤਾ ਪਹਿਲਾਂ ਤਿਆਰੀਆਂ ਸ਼ੁਰੂ ਕਰ ਦੇਣੀਆਂ ਚਾਹੀਦੀਆਂ ਹਨ।
ਫਰੂਟ ਮਾਸਕ : ਕੇਲਾ, ਸੇਬ, ਪਪੀਤੇ ਨੂੰ ਮਿਲਾ ਕੇ ਇਸ ਮਿਸ਼ਰਣ ਨੂੰ ਅੱਧੇ ਘੰਟੇ ਤੱਕ ਚਿਹਰੇ 'ਤੇ ਲਗਾ ਕੇ ਚਿਹਰੇ ਨੂੰ ਤਾਜ਼ੇ-ਠੰਢੇ ਪਾਣੀ ਨਾਲ ਧੋ ਲਓ। ਇਹ ਚਮੜੀ ਨੂੰ ਠੰਢਕ ਦਿੰਦਾ ਹੈ, ਮ੍ਰਿਤਕ ਕੋਸ਼ਿਕਾਵਾਂ ਨੂੰ ਸਾਫ਼ ਕਰਦਾ ਹੈ ਅਤੇ ਚਮੜੀ 'ਤੇ ਕਾਲੇ ਧੱਬਿਆਂ ਨੂੰ ਦੂਰ ਕਰਦਾ ਹੈ।
ਕੁਲਿੰਗ ਮਾਸਕ : ਖੀਰੇ ਦੇ ਰਸ ਵਿਚ 2 ਚਮਚ ਪਾਊਡਰ ਦੁੱਧ ਅਤੇ ਆਂਡੇ ਦਾ ਚਿੱਟਾ ਹਿੱਸਾ ਮਿਲਾ ਕੇ ਮਿਸ਼ਰਣ ਬਣਾ ਲਓ। ਇਸ ਪੇਸਟ ਨੂੰ ਚਿਹਰੇ ਅਤੇ ਧੌਣ 'ਤੇ ਅੱਧੇ ਘੰਟੇ ਤੱਕ ਲਗਾ ਕੇ ਬਾਅਦ ਵਿਚ ਤਾਜ਼ੇ ਅਤੇ ਸਾਫ਼ ਪਾਣੀ ਨਾਲ ਧੋ ਦਿਓ।
ਤੇਲੀ ਚਮੜੀ ਲਈ ਮਾਸਕ : ਇਕ ਚਮਚ ਮੁਲਤਾਨੀ ਮਿੱਟੀ ਵਿਚ ਗੁਲਾਬ ਜਲ ਮਿਲਾ ਕੇ ਪੇਸਟ ਬਣਾ ਲਓ। ਇਸ ਪੇਸਟ ਨੂੰ ਚਿਹਰੇ 'ਤੇ ਲਗਾ ਕੇ ਅੱਧੇ ਘੰਟੇ ਬਾਅਦ ਚਿਹਰੇ ਨੂੰ ਸਾਫ਼ ਪਾਣੀ ਨਾਲ ਧੋ ਦਿਓ। ਫੇਸ ਮਾਸਕ ਲਗਾਉਣ ਤੋਂ ਬਾਅਦ ਦੋ ਰੂੰ ਦੇ ਫਹਿਆਂ ਨੂੰ ਗੁਲਾਬ ਜਲ ਵਿਚ ਭਿਉਂ ਦਿਓ ਅਤੇ ਇਨ੍ਹਾਂ ਨੂੰ ਆਈ ਪੈਡ ਵਾਂਗ ਵਰਤੋ। ਵਰਤੇ ਗਏ ਟੀ-ਬੈਗ ਵੀ ਸੁੰਦਰਤਾ ਨੂੰ ਚਾਰ ਚੰਨ ਲਾ ਸਕਦੇ ਹਨ। ਵਰਤੇ ਗਏ ਟੀ-ਬੈਗ ਨੂੰ ਕੋਸੇ ਪਾਣੀ ਵਿਚ ਭਿਉਂ ਕੇ ਪਾਣੀ ਨੂੰ ਨਿਚੋੜ ਲਓ ਅਤੇ ਬਾਅਦ ਵਿਚ ਇਨ੍ਹਾਂ ਨੂੰ ਆਈ-ਪੈਡ ਵਾਂਗ ਵਰਤੋ।
ਖੁਰਦਰੇ, ਉਲਝੇ ਅਤੇ ਘੁੰਗਰਾਲੇ ਵਾਲਾਂ ਨੂੰ ਮੁਲਾਇਮ ਅਤੇ ਚਮਕਦਾਰ ਕਰਨ ਲਈ ਕ੍ਰੀਮੀ ਹੇਅਰ ਕੰਡੀਸ਼ਨਰ ਵਿਚ ਸਾਫ਼ ਪਾਣੀ ਮਿਲਾ ਕੇ ਇਸ ਨੂੰ ਸਪਰੇਅ ਬੋਤਲ ਵਿਚ ਪਾ ਦਿਓ। ਇਸ ਮਿਸ਼ਰਣ ਨੂੰ ਵਾਲਾਂ 'ਤੇ ਛਿੜਕਾਉਣ ਤੋਂ ਬਾਅਦ ਵਾਲਾਂ ਨੂੰ ਕੰਘੀ ਕਰ ਲਓ ਤਾਂ ਕਿ ਇਹ ਵਾਲਾਂ 'ਤੇ ਪੂਰੀ ਤਰ੍ਹਾਂ ਫੈਲ ਜਾਵੇ। ਬਾਅਦ ਵਿਚ ਇਕ ਘੰਟਾ ਬਾਅਦ ਵਾਲਾਂ ਨੂੰ ਤਾਜ਼ੇ ਅਤੇ ਸਾਫ਼ ਪਾਣੀ ਨਾਲ ਧੋ ਦਿਓ।
ਰੱਖੜੀ ਦਾ ਤਿਉਹਾਰ ਦਿਨ ਨੂੰ ਮਨਾਇਆ ਜਾਂਦਾ ਹੈ। ਦਿਨ ਦੇ ਸਮੇਂ ਦਾ ਹਾਰ-ਸ਼ਿੰਗਾਰ ਹਲਕਾ ਅਤੇ ਸਾਵਧਾਨੀ ਨਾਲ ਕਰਨਾ ਚਾਹੀਦਾ ਹੈ। ਜੇ ਤੁਹਾਡੀ ਚਮੜੀ ਸਾਫ਼ ਹੈ ਤਾਂ ਫਾਊਂਡੇਸ਼ਨ ਤੋਂ ਪ੍ਰਹੇਜ਼ ਕਰੋ। ਚਮੜੀ ਨੂੰ ਸਾਫ਼ ਕਰਨ ਤੋਂ ਬਾਅਦ ਚਮੜੀ 'ਤੇ ਮਾਇਸਚਰਾਈਜ਼ਰ ਸਹਿਤ ਸਨਸਕ੍ਰੀਨ ਦੀ ਵਰਤੋਂ ਕਰਨ ਤੋਂ ਬਾਅਦ ਪਾਊਡਰ ਲਗਾਓ।
ਬੇਬੀ ਪਾਊਡਰ ਵਰਗਾ ਸਾਫ਼ ਅਤੇ ਨਿਰਮਲ ਪਾਊਡਰ ਇਸ ਵਿਚ ਜ਼ਿਆਦਾ ਲਾਭਦਾਇਕ ਸਾਬਤ ਹੋ ਸਕਦਾ ਹੈ। ਤੇਲੀ ਚਮੜੀ ਲਈ ਮਾਇਸਚਰਾਈਜਰ ਦੀ ਜਗ੍ਹਾ ਅਸਟ੍ਰੀਜੈਂਟ ਲੋਸ਼ਨ ਦੀ ਵਰਤੋਂ ਕਰੋ ਅਤੇ ਇਸ ਤੋਂ ਬਾਅਦ ਕੰਪੈਕਟ ਪਾਊਡਰ ਦੀ ਵਰਤੋਂ ਕਰੋ। ਚਿਹਰੇ ਦੇ ਨੱਕ, ਮੱਥੇ ਅਤੇ ਠੋਡੀ ਵਰਗੇ ਤੇਲੀ ਹਿੱਸਿਆਂ ਵੱਲ ਵਿਸ਼ੇਸ਼ ਧਿਆਨ ਦਿਓ। ਇਸ ਪਾਊਡਰ ਨੂੰ ਹਲਕੀ ਗਿੱਲੀ ਸਪੰਜ ਨਾਲ ਚਿਹਰੇ ਅਤੇ ਧੌਣ 'ਤੇ ਲਗਾਓ। ਇਸ ਨਾਲ ਪਾਊਡਰ ਲੰਬੇ ਸਮੇਂ ਤੱਕ ਟਿਕਿਆ ਰਹਿੰਦਾ ਹੈ।
ਜੇ ਤੁਸੀਂ ਬਲੱਸ਼ਰ ਦੀ ਵਰਤੋਂ ਕਰਨੀ ਚਾਹੁੰਦੇ ਹੋ ਤਾਂ ਇਸ ਨੂੰ ਚੰਗੀ ਤਰ੍ਹਾਂ ਬਲੈਂਡ ਕਰ ਲਓ। ਤੁਸੀਂ ਆਪਣੀਆਂ ਅੱਖਾਂ ਦੀਆਂ ਪਲਕਾਂ ਨੂੰ ਭੂਰੇ ਅਤੇ ਸਲੇਟੀ ਆਈ-ਸ਼ੈਡੋ ਨਾਲ ਵੀ ਲਾਈਨ ਕਰ ਸਕਦੇ ਹੋ। ਇਸ ਨਾਲ ਕਾਫੀ ਚੰਗਾ ਪ੍ਰਭਾਵ ਦਿਸਣ ਲੱਗੇਗਾ। ਇਸ ਤੋਂ ਬਾਅਦ ਮਸਕਾਰਾ ਦਾ ਇਕ ਕੋਟ ਲਗਾਉਣ ਨਾਲ ਅੱਖਾਂ ਵਿਚ ਚਮਕ ਆ ਜਾਵੇਗੀ। ਗੂੜ੍ਹੇ ਭੂਰੇ ਰੰਗ ਦੀ ਲਿਪਸਟਿਕ ਤੋਂ ਪ੍ਰਹੇਜ਼ ਕਰੋ। ਤੁਸੀਂ ਹਲਕਾ ਗੁਲਾਬੀ, ਹਲਕੇ ਬੈਂਗਣੀ, ਹਲਕੇ ਭੂਰੇ, ਕਾਂਸੇ ਜਾਂ ਤਾਂਬੇ ਦੇ ਰੰਗ ਦੀ ਲਿਪਸਟਿਕ ਦੀ ਵਰਤੋਂ ਕਰ ਸਕਦੇ ਹੋ। ਲਿਪਸਟਿਕ ਦੇ ਰੰਗ ਬਹੁਤ ਤੇਜ਼ ਅਤੇ ਗੂੜ੍ਹੇ ਜਾਂ ਚਮਕੀਲੇ ਨਹੀਂ ਹੋਣੇ ਚਾਹੀਦੇ। ਪਹਿਲਾਂ ਆਪਣੇ ਬੁੱਲ੍ਹਾਂ ਨੂੰ ਲਿਪਸਟਿਕ ਨਾਲ ਸੀਮਾਂਕਿਤ ਕਰੋ ਅਤੇ ਉਸ ਤੋਂ ਬਾਅਦ ਉਸੇ ਰੰਗ ਦੀ ਲਿਪਸਟਿਕ ਬੁੱਲ੍ਹਾਂ 'ਤੇ ਲਗਾਓ। ਬੁੱਲ੍ਹਾਂ 'ਤੇ ਲਿਪਸਟਿਕ ਬਰੁੱਸ਼ ਦੀ ਮਦਦ ਨਾਲ ਰੰਗਾਂ ਨੂੰ ਭਰੋ। ਰੱਖੜੀ ਦੇ ਵਿਸ਼ੇਸ਼ ਤਿਉਹਾਰਾਂ ਲਈ ਤੁਸੀਂ ਆਕਰਸ਼ਕ ਵਾਲਾਂ ਦਾ ਸਟਾਈਲ ਅਪਣਾ ਸਕਦੇ ਹੋ। ਤੁਸੀਂ ਆਪਣੇ ਵਾਲਾਂ ਨੂੰ ਫੈਂਸੀ ਹੇਅਰ ਕਲਿੱਪ ਜਾਂ ਆਕਰਸ਼ਕ ਰਿਬਨ ਨਾਲ ਬੰਨ੍ਹ ਸਕਦੇ ਹੋ। ਵਾਲਾਂ ਵਿਚ ਫੁੱਲ ਜੜਨ ਨਾਲ ਤੁਹਾਡੀ ਸ਼ਖ਼ਸੀਅਤ ਵਿਚ ਆਕਰਸ਼ਣ ਪੈਦਾ ਹੋ ਸਕਦਾ ਹੈ।
ਘੁੰਗਰਾਲੇ, ਲੰਬੇ ਅਤੇ ਉਛਾਲਦਾਰ ਵਾਲਾਂ ਨੂੰ ਤਿਉਹਾਰਾਂ ਵਿਚ ਇਕ ਵਿਸ਼ੇਸ਼ ਫੈਸ਼ਨ ਦੇਖਣ ਨੂੰ ਮਿਲਦਾ ਹੈ। ਵਾਲਾਂ ਦੇ ਹੇਠਲੇ ਹਿੱਸੇ ਨੂੰ ਮੁਲਾਇਮ ਬਣਾ ਕੇ ਇਨ੍ਹਾਂ ਨੂੰ ਘੁੰਗਰਾਲੇ ਬਣਾਓ। ਵਾਲਾਂ ਦੀ ਪਰੰਪਰਾਗਤ ਗੁੱਤ ਵੀ ਇਸ ਪਾਵਨ ਤਿਉਹਾਰ ਵਿਚ ਚਾਰ ਚੰਦ ਲਗਾਉਂਦੀ ਹੈ। ਵਾਲਾਂ ਦੀ ਗੁੱਤ ਲਗਪਗ ਸਾਰੇ ਚਿਹਰਿਆਂ 'ਤੇ ਆਕਰਸ਼ਕ ਲਗਦੀ ਹੈ ਅਤੇ ਕੁਝ ਚਿਹਰਿਆਂ 'ਤੇ ਲੰਬੀ ਅਤੇ ਕੁਝ ਚਿਹਰਿਆਂ 'ਤੇ ਛੋਟੀ ਘੁਮਾਦਾਰ ਗੁੱਤ ਖੂਬਸੂਰਤੀ ਨੂੰ ਵਧਾਉਂਦੀ ਹੈ। ਗੁੱਤ ਨੂੰ ਰਿਬਨ ਨਾਲ ਬੰਨ੍ਹਣ ਨਾਲ ਇਸ ਦਾ ਆਕਰਸ਼ਣ ਵਧ ਜਾਂਦਾ ਹੈ।
**

ਛੋਟੀਆਂ ਪਰ ਕੰਮ ਦੀਆਂ ਗੱਲਾਂ

* ਫਟੀਆਂ ਅੱਡੀਆਂ ਤੋਂ ਛੁਟਕਾਰਾ ਪਾਉਣ ਲਈ ਕੱਚੇ ਅੰਬ ਨੂੰ ਉਬਾਲੋ। ਜਦੋਂ ਉਹ ਠੰਢਾ ਹੋ ਜਾਵੇ ਤਾਂ ਉਸ ਦੇ ਗੁੱਦੇ ਨੂੰ ਫਟੀਆਂ ਅੱਡੀਆਂ 'ਤੇ ਰਗੜੋ।
* ਆਲੂ ਤਲਣ ਤੋਂ ਪਹਿਲਾਂ ਉਸ ਵਿਚ ਹਲਕਾ ਸੁੱਕਾ ਮੈਦਾ ਛਿੜਕੋ। ਆਲੂ ਜ਼ਿਆਦਾ ਖਸਤਾ ਬਣਨਗੇ।
* ਚਮੜੇ ਦੇ ਪਰਸ ਜਾਂ ਬੈਲਟ ਨੂੰ ਨਵੀਂ ਦਿੱਖ ਦੇਣ ਲਈ ਉਸ 'ਤੇ ਨਿੰਬੂ ਦੀ ਛਿੱਲ ਰਗੜੋ। * ਕੀੜੇ-ਮਕੌੜਿਆਂ ਤੋਂ ਛੁਟਕਾਰਾ ਪਾਉਣ ਲਈ ਘਰ ਦੇ ਹਨੇਰੇ ਕੋਨਿਆਂ ਵਿਚ ਹਲਦੀ ਪਾਊਡਰ ਛਿੜਕ ਦਿਓ।
* ਨਹਾਉਣ ਤੋਂ ਪਹਿਲਾਂ ਪਾਣੀ ਦੀ ਬਾਲਟੀ ਵਿਚ ਦੋ ਚਮਚ ਨਾਰੀਅਲ ਦਾ ਤੇਲ ਪਾਓ। ਚਮੜੀ 'ਤੇ ਅਨੋਖੀ ਚਮਕ ਮਹਿਸੂਸ ਕਰੋਗੇ। * ਦਾਲ ਫਰਾਈ ਨੂੰ ਸੰਘਣੀ ਬਣਾਉਣ ਲਈ ਇਕ ਛੋਟੀ ਕਟੋਰੀ ਉਬਲੀ ਦਾਲ ਨੂੰ ਮਿਕਸੀ ਵਿਚ ਫੈਂਟ ਲਓ। ਉਸ ਨੂੰ ਬਾਕੀ ਦਾਲ ਵਿਚ ਮਿਲਾ ਦਿਓ। * ਨਵੀਂ ਜੁੱਤੀ ਜਿੱਥੋਂ ਪੈਰ ਨੂੰ ਕੱਟ ਰਹੀ ਹੋਵੇ, ਉਥੋਂ ਜੁੱਤੀ ਦੀ ਅੰਦਰੂਨੀ ਜਗ੍ਹਾ 'ਤੇ ਮੋਮ ਨੂੰ ਰਗੜੋ।
* ਸਬਜ਼ੀ ਜ਼ਿਆਦਾ ਤਿੱਖੀ ਬਣ ਗਈ ਹੋਵੇ ਤਾਂ ਉਸ ਵਿਚ ਥੋੜ੍ਹੀ ਟਮੈਟੋ ਸਾਸ ਪਾਓ।
* ਚੋਕਰ ਦੀ ਵਰਤੋਂ ਚਮੜੀ ਸਕਰੱਬ ਦੇ ਰੂਪ ਵਿਚ ਕਰ ਸਕਦੇ ਹੋ। ਚੋਕਰ ਦੇ ਖੁਰਦਰੇਪਨ ਨੂੰ ਘੱਟ ਕਰਨ ਲਈ ਚੋਕਰ ਨੂੰ ਦੁੱਧ ਵਿਚ ਮਿਲਾ ਕੇ ਉਸ ਦਾ ਪੇਸਟ ਬਣਾਓ। * ਸਰਦੀਆਂ ਵਿਚ ਨਾਰੀਅਲ ਦਾ ਤੇਲ ਨਾ ਜੰਮੇ, ਇਸ ਵਾਸਤੇ ਉਸ ਵਿਚ ਕੁਝ ਬੂੰਦਾਂ ਕੈਸਟਰ ਆਇਲ ਦੀਆਂ ਪਾਓ। ਤੇਲ ਨਹੀਂ ਜੰਮੇਗਾ। * ਮੂੰਹ ਦੀ ਬਦਬੂ ਦੂਰ ਕਰਨ ਲਈ ਨਿੰਬੂ ਦੇ ਰਸ ਅਤੇ ਗੁਲਾਬ ਜਲ ਨੂੰ ਮਿਲਾ ਕੇ ਗਰਾਰੇ ਕਰੋ। * ਸੂਤੀ ਕੱਪੜਿਆਂ ਦੇ ਦਾਗ ਦੂਰ ਕਰਨ ਲਈ ਨਿੰਬੂ 'ਤੇ ਨਮਕ ਪਾ ਕੇ ਦਾਗ ਵਾਲੀ ਜਗ੍ਹਾ 'ਤੇ ਰਗੜਨ ਤੋਂ ਬਾਅਦ ਧੋ ਦਿਓ, ਦਾਗ ਦੂਰ ਹੋ ਜਾਣਗੇ।
**

ਖਾਧ ਪਦਾਰਥਾਂ ਦੀ ਸੁਰੱਖਿਆ

ਥੋੜ੍ਹੀ ਜਿਹੀ ਲਾਪ੍ਰਵਾਹੀ ਦੇ ਕਾਰਨ ਖਾਧ ਪਦਾਰਥ ਖਰਾਬ ਹੋ ਜਾਂਦੇ ਹਨ। ਇਸ ਮੌਸਮ ਵਿਚ ਨਮੀ ਹੋਣ ਕਾਰਨ ਕੀੜੇ ਵੀ ਪੈਣ ਲੱਗ ਜਾਂਦੇ ਹਨ ਅਤੇ ਉਨ੍ਹਾਂ ਦੇ ਪੋਸ਼ਕ ਤੱਤ ਨਸ਼ਟ ਹੋ ਕੇ ਬੇਸਵਾਦ ਲੱਗਣ ਲਗਦੇ ਹਨ। ਕੁਝ ਉਪਾਅ ਕਰਕੇ ਤੁਸੀਂ ਖਾਧ ਪਦਾਰਥਾਂ ਨੂੰ ਸੁਰੱਖਿਅਤ ਰੱਖ ਸਕਦੇ ਹੋ-* ਅਨਾਜ ਅਤੇ ਦਾਲਾਂ ਵਿਚ ਕੀੜੇ ਨਾ ਪੈਣ, ਇਸ ਵਾਸਤੇ ਨਿੰਮ ਦੇ ਸੁੱਕੇ ਪੱਤਿਆਂ ਦੀ ਵਰਤੋਂ ਕਰੋ।
* ਸੁੱਕੇ ਮੇਵਿਆਂ ਦੇ ਡੱਬੇ ਵਿਚ 3-4 ਲੌਂਗ ਪਾ ਦਿਓ।
* ਖੰਡ ਨੂੰ ਪਾਲੀਥੀਨ ਵਿਚ ਬੰਦ ਕਰਕੇ ਹਵਾਬੰਦ ਡੱਬੇ ਵਿਚ ਰੱਖੋ। * ਗੁੜ ਨੂੰ ਕੀੜੀਆਂ ਅਤੇ ਮਕੌੜਿਆਂ ਤੋਂ ਬਚਾਉਣ ਲਈ ਤੰਗ ਮੂੰਹ ਵਾਲੇ ਮਰਤਬਾਨ ਵਿਚ ਰੱਖੋ ਅਤੇ ਆਲੇ-ਦੁਆਸੇ ਨਮਕ ਛਿੜਕ ਦਿਓ।
* ਸਾਰੇ ਤਰ੍ਹਾਂ ਦੇ ਮਸਾਲਿਆਂ ਨੂੰ ਨਮੀ ਵਾਲੀ ਜਗ੍ਹਾ ਤੋਂ ਦੂਰ ਹਵਾਬੰਦ ਡੱਬਿਆਂ ਵਿਚ ਰੱਖੋ। ਇਨ੍ਹਾਂ ਨੂੰ ਹਵਾਦਾਰ ਅਤੇ ਰੌਸ਼ਨੀ ਵਾਲੇ ਕਮਰੇ ਵਿਚ ਰੱਖਣ ਨਾਲ ਖਰਾਬ ਨਹੀਂ ਹੋਣਗੇ। * ਇਮਲੀ ਵਿਚ ਬਬੂਲ ਦੇ ਸੁੱਕੇ ਪੱਤੇ ਰੱਖੋ। ਇਸ ਨਾਲ ਇਮਲੀ ਵਿਚ ਕੀੜੇ ਨਹੀਂ ਪੈਣਗੇ। * ਆਲੂ ਨੂੰ ਰੇਤ ਵਿਚ ਦਬਾਉਣ ਨਾਲ ਉਸ ਵਿਚ ਠੋਸਪਣ ਬਣਿਆ ਰਹੇਗਾ। * ਤੇਲ ਅਤੇ ਘਿਓ ਦੇ ਪੈਕ ਡੱਬਿਆਂ 'ਤੇ ਫਟਕੜੀ ਫੈਲਾਅ ਕੇ ਰੱਖਣ ਨਾਲ ਉਨ੍ਹਾਂ 'ਤੇ ਉੱਲੀ ਅਤੇ ਹਰੀ ਕਾਈ ਨਹੀਂ ਲਗਦੀ।
* ਅਚਾਰ ਨੂੰ ਉੱਲੀ ਤੋਂ ਬਚਾਉਣ ਲਈ ਉਚਿਤ ਮਾਤਰਾ ਵਿਚ ਤੇਲ ਅਤੇ ਨਮਕ ਦੀ ਵਰਤੋਂ ਕਰੋ।
* ਅਚਾਰ ਨੂੰ ਕੱਚ ਜਾਂ ਖੰਡ ਦੇ ਮਰਤਬਾਨਾਂ ਵਿਚ ਹੀ ਰੱਖੋ।
* ਆਟੇ ਨੂੰ ਹਵਾਬੰਦ ਭਾਂਡੇ ਜਾਂ ਡਰੰਮੀ ਵਿਚ ਪਾ ਕੇ ਅਜਿਹੀ ਜਗ੍ਹਾ ਰੱਖੋ, ਜਿਥੇ ਨਮੀ ਨਾ ਹੋਵੇ।


-ਸੰਜੇ ਕੁਮਾਰ ਚਤੁਰਵੇਦੀ 'ਪ੍ਰਦੀਪ'

ਬਿਨਾਂ ਆਂਡੇ ਦਾ ਕੇਕ (ਦਹੀਂ ਵਾਲਾ)

ਸਮੱਗਰੀ
ਮੈਦਾ-1.5 ਕੱਪ (140 ਗ੍ਰਾਮ)
ਸੰਘਣਾ ਦਹੀਂ-1 ਕੱਪ (150 ਗ੍ਰਾਮ)
ਪੀਸੀ ਹੋਈ ਖੰਡ-3/4 ਕੱਪ (100 ਗ੍ਰਾਮ)
ਰਿਫਾਇੰਡ ਤੇਲ-1/2 ਕੱਪ (65 ਗ੍ਰਾਮ)
ਬੇਕਿੰਗ ਪਾਊਡਰ-1 ਚਮਚ
ਸੋਢਾ ਬਾਈਕਾਰਬੋਨੇਟ-1 ਚਮਚ
ਵੈਨੀਲਾ ਐਸੈਂਸ-ਕੁਝ ਬੂੰਦਾਂ
ਵਿਧੀ : 1. ਖੰਡ ਅਤੇ ਦਹੀਂ ਨੂੰ ਚੰਗੀ ਤਰ੍ਹਾਂ ਰਲਾ ਲਓ।
2. ਬੇਕਿੰਗ ਪਾਊਡਰ ਅਤੇ ਸੋਢਾ ਬਾਈਕਾਰਬੋਨੇਟ ਨੂੰ ਮਿਲਾ ਲਓ, ਇਸ ਨੂੰ 2-3 ਮਿੰਟ ਲਈ ਪਿਆ ਰਹਿਣ ਦਿਓ।
3. ਮੈਦਾ ਚੰਗੀ ਤਰ੍ਹਾਂ ਛਾਣ ਲਓ ਅਤੇ ਅਲੱਗ ਤੋਂ ਰੱਖ ਦਿਓ।
4. ਹੁਣ ਮੈਦੇ ਵਿਚ ਬੇਕਿੰਗ ਪਾਊਡਰ ਅਤੇ ਸੋਢਾ ਬਾਈਕਾਰਬੋਨੇਟ ਦਾ ਪਾਊਡਰ ਮਿਲਾ ਦਿਓ ਅਤੇ 4 ਤੋਂ 5 ਵਾਰੀ ਛਾਣ ਦਿਓ।
5. ਹੁਣ ਮੈਦੇ ਵਿਚ ਤੇਲ ਅਤੇ ਵੈਨੀਲਾ ਐਸੇਂਸ ਮਿਲਾ ਦਿਓ। ਇਸ ਵਿਚ ਖੰਡ ਅਤੇ ਦਹੀਂ ਦੇ ਮਿਸ਼ਰਣ ਨੂੰ ਮਿਲਾ ਦਿਓ ਅਤੇ ਚੰਗੀ ਤਰ੍ਹਾਂ ਹਿਲਾਉਂਦੇ ਜਾਓ।
6. ਇਸ ਨੂੰ ਹਿਲਾਉਣ ਦਾ ਢੰਗ ਕੱਟ ਅਤੇ ਫੋਲਡ ਹੋਣਾ ਚਾਹੀਦਾ ਹੈ ਅਤੇ ਇਕ ਹੀ ਦਿਸ਼ਾ ਵਿਚ ਹਿਲਾਉਣਾ ਚਾਹੀਦਾ ਹੈ।
7. ਜੇਕਰ ਇਹ ਮਿਸ਼ਰਣ ਗਾੜ੍ਹਾ ਲੱਗੇ ਤਾਂ ਇਸ ਵਿਚ ਥੋੜ੍ਹਾ ਦੁੱਧ ਵੀ ਮਿਲਾਇਆ ਜਾ ਸਕਦਾ ਹੈ। ਇਸ ਮਿਸ਼ਰਣ ਨੂੰ ਉੱਪਰ ਚੁੱਕ ਕੇ ਦੇਖੋ ਤਾਂ ਧਾਰ ਬਣਨੀ ਚਾਹੀਦੀ ਹੈ। ਫਿਰ ਇਸ ਮਿਸ਼ਰਣ ਨੂੰ ਐਲੂਮੀਨੀਅਮ ਦੇ ਬਰਤਨ ਵਿਚ ਅੰਦਰਲੀ ਸਾਈਡ ਘਿਓ ਲਗਾ ਕੇ ਘੋਲ ਵਿਚ ਪਾ ਦਿਓ।
ਹੁਣ ਪ੍ਰੈਸ਼ਰ ਕੁੱਕਰ ਵਿਚ ਰੇਤਾ ਪਾ ਦਿਓ। ਇਸ ਉੱਪਰ ਇਕ ਕੁੱਕਰ ਵਾਲੀ ਜਾਲੀ ਰੱਖ ਦਿਓ ਤਾਂ ਕਿ ਕੇਕ ਹੇਠਾਂ ਤੋਂ ਸੜਨ ਤੋਂ ਬਚ ਜਾਵੇ। ਗੈਸ ਘੱਟ ਕਰਕੇ ਕੁੱਕਰ ਉੱਪਰ ਰੱਖ ਦਿਓ। ਇਸ ਵਿਚ ਐਲੂਮੀਨੀਅਮ ਦਾ ਮਿਸ਼ਰਣ ਵਾਲਾ ਬਰਤਨ ਰੱਖ ਦਿਓ। ਯਾਦ ਰਹੇ ਕਿ ਕੁੱਕਰ ਬੰਦ ਕਰਨ ਵੇਲੇ ਇਸ ਦੀ ਸੀਟੀ ਉਤਾਰ ਦਿਓ। ਕੇਕ ਨੂੰ ਬਣਨ ਵਿਚ 40-45 ਕੁ ਮਿੰਟ ਦਾ ਸਮਾਂ ਲੱਗ ਜਾਵੇਗਾ। ਕੇਕ ਨੂੰ ਪਰਖਣ ਲਈ ਕਿ ਕੇਕ ਪੱਕ ਚੁੱਕਾ ਹੈ ਜਾਂ ਨਹੀਂ, ਚਾਕੂ ਲੈ ਕੇ ਬਿਲਕੁਲ ਵਿਚਕਾਰ ਚੋਭ ਕੇ ਦੇਖੋ। ਜੇਕਰ ਚਾਕੂ ਨਾਲ ਮਿਸ਼ਰਣ ਲੱਗ ਜਾਵੇ ਤਾਂ ਅਜੇ ਕੇਕ ਕੱਚਾ ਹੈ। ਜੇਕਰ ਮਿਸ਼ਰਣ ਚਾਕੂ ਨਾਲ ਨਹੀਂ ਲੱਗਿਆ ਤਾਂ ਕੇਕ ਬਿਲਕੁਲ ਤਿਆਰ ਹੈ। ਗੈਸ ਬੰਦ ਕਰਕੇ ਕੇਕ ਉਤਾਰ ਲਓ ਅਤੇ ਠੰਢਾ ਹੋਣ ਦਿਓ। ਕੇਕ ਵਾਲਾ ਬਰਤਨ ਉਲਟਾ ਕਰਕੇ ਥਾਲੀ ਵਿਚ ਕੱਢ ਦਿਓ।
ਜੇਕਰ ਕੇਕ ਨੂੰ ਕਿਸੇ ਮੌਕੇ 'ਤੇ ਕੱਟਣ ਚਾਹੁੰਦੇ ਹੋਵੇ ਤੇ ਇਸ ਉੱਪਰ ਕਰੀਮ ਲਗਾਉਣੀ ਚਾਹੁੰਦੇ ਹੋ ਤਾਂ ਮਲਾਈ ਖੰਡ ਪਾ ਕੇ ਚੰਗੀ ਤਰ੍ਹਾਂ ਫੈਂਟ ਲਓ ਅਤੇ ਮਲਾਈ ਫੁੱਲ ਜਾਵੇਗੀ ਤਾਂ ਤੁਸੀਂ ਕੇਕ ਦੇ ਉੱਪਰ ਚਮਚ ਨਾਲ ਮਿਲਾਈ ਲਗਾ ਲਓ। ਜੇਕਰ ਕੇਕ ਦੇ ਉੱਪਰ ਕੁਝ ਲਿਖਣਾ ਚਾਹੁੰਦੇ ਹੋ ਤਾਂ ਜੈਮ ਨੂੰ ਪਤਲਾ ਕਰਕੇ ਕੋਣ ਵਿਚ ਪਾ ਕੇ ਉੱਪਰ ਕੁਝ ਵੀ ਲਿਖ ਵੀ ਸਕਦੇ ਹੋ। ਜੇਕਰ ਤੁਸੀਂ ਸੁੱਕੇ ਮੇਵੇ ਪਾਉਣਾ ਚਾਹੁੰਦੇ ਹੋ ਤਾਂ ਮਿਸ਼ਰਣ ਦੇ ਵਿਚ ਹੀ ਸੱਕੇ ਮੇਵੇ ਵੀ ਬਾਰੀਕ-ਬਾਰੀਕ ਕੱਟ ਕੇ ਜਾਂ ਕੱਦੂਕਸ਼ ਕਰਕੇ ਪਾ ਸਕਦੇ ਹੋ।


-ਰਜਿੰਦਰ ਕੌਰ ਸਿੱਧੂ
ਕੇ.ਵੀ.ਕੇ, ਮਾਨਸਾ।
ਮਨਦੀਪ ਸ਼ਰਮਾ
ਕੇ.ਵੀ.ਕੇ, ਫਤਹਿਗੜ੍ਹ ਸਾਹਿਬ।





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX