ਪਿਛਲੇ ਦਿਨੀਂ ਕਾਂਗਰਸ ਨੇ ਰਾਜਸਥਾਨ ਵਿਚ 3 ਦਿਨਾ ਨਵ ਸੰਕਲਪ ਚਿੰਤਨ ਸ਼ਿਵਰ ਕਰਵਾਇਆ ਸੀ। ਇਸ ਵਿਚ ਦੇਸ਼ ਭਰ ਤੋਂ ਚੁਣ ਕੇ ਆਗੂਆਂ ਨੂੰ ਬੁਲਾਇਆ ਗਿਆ ਸੀ। ਇਸ ਸੰਮੇਲਨ ਵਿਚ ਇਹ ਆਸ ਕੀਤੀ ਜਾਂਦੀ ਸੀ ਕਿ ਪਾਰਟੀ ਦੀ ਲੀਡਰਸ਼ਿਪ ਵਿਚ ਵੱਡਾ ਬਦਲਾਅ ਵੇਖਣ ਨੂੰ ਮਿਲੇਗਾ, ਕਿਉਂਕਿ ਪਿਛਲੇ ਲੰਮੇ ਸਮੇਂ ਤੋਂ ਕਾਂਗਰਸ ਅੰਦਰ ਬਹੁਤ ਸਾਰੇ ਪ੍ਰਬੁੱਧ ਅਤੇ ਵੱਡੇ ਨੇਤਾਵਾਂ ਵਲੋਂ ਅਜਿਹੀ ਮੰਗ ਕੀਤੀ ਜਾਂਦੀ ਰਹੀ ਸੀ ਤੇ ਇਹ ਵੀ ਕਿ ਪਾਰਟੀ 'ਤੇ ਲਗਾਤਾਰ ਇਕ ਪਰਿਵਾਰ ਦਾ ਗਲਬਾ ਨਹੀਂ ਬਣਿਆ ਰਹਿਣਾ ਚਾਹੀਦਾ। ਪਰ ਇਹ ਸੰਮੇਲਨ ਆਪਸੀ ਗੱਲਾਂਬਾਤਾਂ ਦਾ ਹੀ ਹੋ ਨਿੱਬੜਿਆ।
ਭਾਵੇਂ ਇਸ ਵਿਚ ਆਉਂਦੇ ਸਮੇਂ ਵਿਚ 50 ਫ਼ੀਸਦੀ ਨੌਜਵਾਨਾਂ ਨੂੰ ਅਹਿਮ ਅਹੁਦੇ ਦੇਣ ਦਾ ਐਲਾਨ ਵੀ ਕੀਤਾ ਗਿਆ ਅਤੇ ਇਹ ਵੀ ਕਿ ਕਾਂਗਰਸ ਦੇਸ਼ ਦੇ ਭਾਈਚਾਰਿਆਂ ਨੂੰ ਜੋੜਨ ਲਈ ਦੇਸ਼ ਭਰ ਵਿਚ ਯਾਤਰਾ ਕਰੇਗੀ। ਅੱਜ ਅਜਿਹੀ ਯਾਤਰਾ ਦੀ ਲੋੜ ਵੀ ਜਾਪਦੀ ਹੈ, ਕਿਉਂਕਿ ਭਾਜਪਾ ਨੇ ਅਜਿਹੇ ਫ਼ਿਰਕੂ ਅਨਸਰਾਂ ਦੀ ਹਮਾਇਤ ਕਰਨੀ ਸ਼ੁਰੂ ਕਰ ਦਿੱਤੀ ਹੈ, ਜਿਨ੍ਹਾਂ ਦੀਆਂ ਸਰਗਰਮੀਆਂ ਅਤੇ ਬਿਆਨਾਂ ਨਾਲ ਦੇਸ਼ ਦੇ ਭਾਈਚਾਰਿਆਂ ਵਿਚ ਆਪਸ ਵਿਚ ਨਫ਼ਰਤ ਪੈਦਾ ਹੋ ਰਹੀ ਹੈ ਜੋ ਦੇਸ਼ ਦੀ ਏਕਤਾ, ਅਖੰਡਤਾ ਅਤੇ ਸਾਂਝ ਲਈ ਬੇਹੱਦ ਨੁਕਸਾਨਦੇਹ ਸਾਬਤ ਹੋ ਸਕਦੀ ਹੈ, ਪਰ ਅਜਿਹਾ ਤਦੇ ਹੀ ਸੰਭਵ ਹੋ ਸਕਦਾ ਹੈ ਜੇਕਰ ਪਾਰਟੀ ਵਿਚ ਵੱਡੀਆਂ ਤਬਦੀਲੀਆਂ ਹੋਣ। ਲਗਾਤਾਰ ਪਿਛਾਂਹ ਵੱਲ ਜਾ ਰਹੀ ਇਸ ਕੌਮੀ ਪਾਰਟੀ ਵਿਚ ਪੁਨਰ-ਜਾਗ੍ਰਿਤੀ ਪੈਦਾ ਕਰਨ ਦਾ ਯਤਨ ਕੀਤਾ ਜਾਏ ਅਤੇ ਇਸ ਨੂੰ ਪਰਿਵਾਰਵਾਦ ਦੇ ਗਲਬੇ 'ਚੋਂ ਕੱਢਿਆ ਜਾਏ। ਇਸ ਦੇ ਨਾਲ ਹੀ ਕਾਂਗਰਸ ਸਮੇਤ ਦੇਸ਼ ਦੀਆਂ ਵੱਡੀਆਂ ਵਿਰੋਧੀ ਪਾਰਟੀਆਂ ਨੂੰ ਇਕ ਮੰਚ 'ਤੇ ਲਿਆ ਕੇ ਇਕ ਮਜ਼ਬੂਤ ਮੁਹਾਜ਼ ਬਣਾਉਣ ਦੀ ਜ਼ਰੂਰਤ ਹੋਵੇਗੀ ਪਰ ਜਿਸ ਤਰ੍ਹਾਂ ਇਸ ਪਾਰਟੀ ਨੂੰ ਲਗਾਤਾਰ ਖੋਰਾ ਲੱਗ ਰਿਹਾ ਹੈ, ਉਸ ਨੂੰ ਵੇਖਦਿਆਂ ਇਹ ਛੇਤੀ ਉੱਭਰਦੀ ਨਜ਼ਰ ਨਹੀਂ ਆ ਰਹੀ। ਪਿਛਲੇ ਕੁਝ ਸਾਲਾਂ ਵਿਚ ਹੀ 5 ਵੱਡੇ ਆਗੂਆਂ ਨੇ ਪਾਰਟੀ ਨੂੰ ਛੱਡਣ ਦਾ ਐਲਾਨ ਕੀਤਾ ਹੈ, ਜਿਨ੍ਹਾਂ ਵਿਚ ਜਯੋਤੀਰਾਦਿੱਤਿਆ ਸਿੰਧੀਆ, ਜਿਤਿਨ ਪ੍ਰਸਾਦ, ਹਿੰਮਤ ਬਿਸਵਾ ਸਰਮਾ ਅਤੇ ਪੇਮਾ ਖਾਂਡੂ ਆਦਿ ਸ਼ਾਮਿਲ ਹਨ। ਹੁਣ ਹਾਰਦਿਕ ਪਟੇਲ ਜੋ ਕਿ ਪਿਛਲੇ 3 ਸਾਲ ਤੋਂ ਗੁਜਰਾਤ ਵਿਚ ਕਾਂਗਰਸ ਨਾਲ ਜੁੜ ਕੇ ਵੱਡੀ ਭੂਮਿਕਾ ਨਿਭਾਅ ਰਹੇ ਸਨ, ਨੇ ਵੀ ਕਾਂਗਰਸ ਛੱਡਣ ਦਾ ਐਲਾਨ ਕਰ ਦਿੱਤਾ ਹੈ। ਹਾਰਦਿਕ 2019 ਵਿਚ ਕਾਂਗਰਸ ਵਿਚ ਸ਼ਾਮਿਲ ਹੋਇਆ ਸੀ, ਉਸ ਨੇ ਪਾਰਟੀ ਅੰਦਰ ਪੈਦਾ ਹੋਈ ਅਸੰਤੁਸ਼ਟਤਾ ਬਾਰੇ ਸੋਨੀਆ ਗਾਂਧੀ ਨੂੰ ਲੰਮਾ ਪੱਤਰ ਵੀ ਲਿਖਿਆ ਹੈ ਕਿ ਜਦੋਂ ਵੀ ਉਸ ਨੇ ਗੁਜਰਾਤ ਦੇ ਲੋਕਾਂ ਦੇ ਮੁੱਦਿਆਂ ਦੀ ਗੱਲ ਵੱਡੇ ਕਾਂਗਰਸੀ ਆਗੂਆਂ ਕੋਲ ਕਰਨ ਦਾ ਯਤਨ ਕੀਤਾ, ਉਨ੍ਹਾਂ ਨੇ ਇਸ ਪ੍ਰਤੀ ਪੂਰੀ ਤਰ੍ਹਾਂ ਬੇਰੁਖ਼ੀ ਹੀ ਅਪਣਾਈ ਰੱਖੀ।
ਹਾਰਦਿਕ ਪਟੇਲ ਤੋਂ ਬਾਅਦ ਹੁਣ ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਵਲੋਂ ਕੁਝ ਦਿਨ ਪਹਿਲਾਂ ਕਾਂਗਰਸ ਨੂੰ ਛੱਡਣ ਦੇ ਐਲਾਨ ਤੋਂ ਬਾਅਦ ਉਨ੍ਹਾਂ ਦੇ ਭਾਜਪਾ ਵਿਚ ਸ਼ਾਮਿਲ ਹੋਣ ਨੇ ਜਿਥੇ ਪਾਰਟੀ ਦੀਆਂ ਚਿੰਤਾਵਾਂ ਨੂੰ ਹੋਰ ਵਧਾ ਦਿੱਤਾ ਹੈ, ਉਥੇ ਇਸ ਦੇ ਹੋਰ ਵੀ ਕਮਜ਼ੋਰ ਹੋਣ ਦੀ ਸੰਭਾਵਨਾ ਬਣ ਗਈ ਹੈ ਅਤੇ ਇਹ ਵੀ ਕਿ ਆਉਂਦੇ ਸਮੇਂ ਵਿਚ ਇਹ ਕੌਮੀ ਸਿਆਸਤ ਵਿਚ ਆਪਣਾ ਕੋਈ ਪ੍ਰਭਾਵਸ਼ਾਲੀ ਰੋਲ ਅਦਾ ਨਹੀਂ ਕਰ ਸਕੇਗੀ। ਇਸ ਨੂੰ ਖੋਰਾ ਲਗਦੇ ਰਹਿਣ ਦਾ ਇਸ ਗੱਲ ਤੋਂ ਹੀ ਪਤਾ ਲੱਗ ਜਾਂਦਾ ਹੈ ਕਿ ਸਾਲ 2014 ਤੋਂ ਬਾਅਦ ਹੋਈਆਂ 49 'ਚੋਂ 39 ਚੋਣਾਂ ਵਿਚ ਇਸ ਨੂੰ ਹਾਰ ਦਾ ਮੂੰਹ ਦੇਖਣਾ ਪਿਆ ਹੈ। ਇਸ ਦੀ ਪ੍ਰਸ਼ਾਸਨਿਕ ਹੋਂਦ ਛੱਤੀਸਗੜ੍ਹ ਅਤੇ ਰਾਜਸਥਾਨ ਵਿਚ ਹੀ ਬਚੀ ਰਹਿ ਸਕੀ ਹੈ। ਅੱਜ ਬਹੁਤੇ ਵੱਡੇ ਆਗੂਆਂ ਨੇ ਚਾਹੇ ਅਜੇ ਪਾਰਟੀ ਤੋਂ ਕਿਨਾਰਾ ਨਹੀਂ ਕੀਤਾ ਪਰ ਉਨ੍ਹਾਂ ਦੇ ਹਾਵ-ਭਾਵ ਪੂਰੀ ਤਰ੍ਹਾਂ ਅਸੰਤੁਸ਼ਟੀ ਵਾਲੇ ਜਾਪਦੇ ਹਨ। ਸੁਨੀਲ ਜਾਖੜ ਦਾ ਪਾਰਟੀ ਵਿਚ ਵੱਡਾ ਪ੍ਰਭਾਵ ਬਣਿਆ ਰਿਹਾ ਹੈ। ਉਨ੍ਹਾਂ ਦੇ ਪਿਤਾ ਬਲਰਾਮ ਜਾਖੜ ਲੋਕ ਸਭਾ ਦੇ ਸਪੀਕਰ ਤੋਂ ਲੈ ਕੇ ਹੋਰ ਵੱਡੇ ਕੌਮੀ ਅਹੁਦਿਆਂ 'ਤੇ ਬਣੇ ਰਹੇ ਸਨ। ਉਨ੍ਹਾਂ ਦਾ ਪਰਿਵਾਰ ਪਿਛਲੇ 50 ਸਾਲ ਤੋਂ ਕਾਂਗਰਸ ਨਾਲ ਜੁੜਿਆ ਰਿਹਾ ਅਤੇ ਉਸ ਦਾ ਭਤੀਜਾ ਸੰਦੀਪ ਜਾਖੜ ਪਿਛਲੀਆਂ ਚੋਣਾਂ ਵਿਚ ਹੀ ਪੰਜਾਬ ਵਿਧਾਨ ਸਭਾ ਲਈ ਚੁਣਿਆ ਗਿਆ ਸੀ। ਜਾਖੜ ਨੇ ਜਿਥੇ ਕਾਂਗਰਸ ਨੂੰ ਛੱਡਦਿਆਂ ਇਸ ਦੀ ਲੀਡਰਸ਼ਿਪ ਦੀ ਸਖ਼ਤ ਆਲੋਚਨਾ ਕੀਤੀ ਹੈ, ਉਥੇ ਭਾਜਪਾ ਵਿਚ ਸ਼ਾਮਿਲ ਹੋਣ ਸਮੇਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਗੁਣਗਾਣ ਵੀ ਕੀਤਾ ਹੈ। ਤਿੰਨ ਵਾਰ ਵਿਧਾਨ ਸਭਾ, ਇਕ ਵਾਰ ਲੋਕ ਸਭਾ ਅਤੇ ਸੂਬੇ ਦੀ ਪਾਰਟੀ ਦੀ ਪ੍ਰਧਾਨਗੀ ਤੋਂ ਬਾਅਦ ਜਾਖੜ ਵਲੋਂ ਚੁੱਕੇ ਇਸ ਕਦਮ ਨਾਲ ਪੰਜਾਬ ਵਿਚ ਵੀ ਕਾਂਗਰਸ ਨੂੰ ਇਕ ਵੱਡਾ ਝਟਕਾ ਲੱਗਾ ਹੈ। ਪੰਜਾਬ ਵਿਧਾਨ ਸਭਾ ਵਿਚ ਇਸ ਦੇ ਵਿਧਾਇਕਾਂ ਦੀ ਗਿਣਤੀ ਡੇਢ ਕੁ ਦਰਜਨ ਹੀ ਰਹਿ ਗਈ ਹੈ। ਨਿੱਤ ਦਿਨ ਹੀ ਸੂਬੇ ਦੀ ਪਾਰਟੀ ਵਿਚ ਲਗਾਤਾਰ ਪਾਟੋ-ਧਾੜ ਦੀਆਂ ਖ਼ਬਰਾਂ ਆ ਰਹੀਆਂ ਹਨ। ਵਿਧਾਨ ਸਭਾ ਦੀਆਂ ਚੋਣਾਂ ਵਿਚ ਵੀ ਵੱਡੀ ਹੱਦ ਤੱਕ ਪਾਰਟੀ ਦਾ ਨੁਕਸਾਨ ਆਪਸੀ ਖਹਿਬਾਜ਼ੀ ਅਤੇ ਆਗੂਆਂ ਵਲੋਂ ਇਕ-ਦੂਜੇ ਵਿਰੁੱਧ ਬਿਆਨਬਾਜ਼ੀ ਕਰਦੇ ਰਹਿਣ ਕਾਰਨ ਹੋਇਆ ਸੀ ਪਰ ਇਸ ਤੋਂ ਬਾਅਦ ਵੀ ਪਾਰਟੀ ਨੇ ਕੋਈ ਬਹੁਤਾ ਸਬਕ ਨਹੀਂ ਸਿੱਖਿਆ। ਚਾਹੇ ਨਵਾਂ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਇਸ ਦੀ ਸਰਗਰਮੀ ਨੂੰ ਵਧਾਉਣ ਦਾ ਯਤਨ ਤਾਂ ਜ਼ਰੂਰ ਕਰ ਰਿਹਾ ਹੈ ਪਰ ਲੀਡਰਸ਼ਿਪ ਵਿਚ ਆਪਸੀ ਫੁੱਟ ਅਜੇ ਵੀ ਜੱਗ-ਜ਼ਾਹਰ ਹੈ। ਇਸ ਦਾ ਇਲਾਜ ਛੇਤੀ ਕੀਤਿਆਂ ਲੱਭਿਆ ਜਾਣਾ ਮੁਸ਼ਕਿਲ ਹੈ। ਚਾਹੇ ਸੂਬੇ ਵਿਚ 'ਆਪ' ਦੀ ਸਰਕਾਰ ਹਾਲੇ ਤੱਕ ਪੈਰਾਂ 'ਤੇ ਖੜ੍ਹੀ ਨਹੀਂ ਹੋ ਸਕੀ ਅਤੇ ਨਿੱਤ ਦਿਨ ਇਹ ਨਵੇਂ ਵਿਵਾਦਾਂ ਵਿਚ ਵੀ ਘਿਰਦੀ ਜਾ ਰਹੀ ਹੈ ਪਰ ਇਸ ਦੇ ਬਾਵਜੂਦ ਪੰਜਾਬ ਦੀਆਂ ਰਵਾਇਤੀ ਪਾਰਟੀਆਂ ਵੀ ਏਨੀਆਂ ਕਮਜ਼ੋਰ ਹੋਈਆਂ ਜਾਪਦੀਆਂ ਹਨ ਕਿ ਉਨ੍ਹਾਂ ਦੇ ਛੇਤੀ ਮੁੜ ਸਥਾਪਤ ਹੋੋਣ ਦੀ ਸੰਭਾਵਨਾ ਨਜ਼ਰ ਨਹੀਂ ਆਉਂਦੀ, ਇਸ ਸਥਿਤੀ ਵਿਚ ਹੀ ਸੂਬਾਈ ਕਾਂਗਰਸ ਵੀ ਡਿੱਕੋ-ਡੋਲੇ ਖਾਂਦੀ ਦਿਖਾਈ ਦੇ ਰਹੀ ਹੈ।
-ਬਰਜਿੰਦਰ ਸਿੰਘ ਹਮਦਰਦ
ਕੱਲ੍ਹ ਚੰਡੀਗੜ੍ਹ ਵਿਚ ਕਿਸਾਨ ਜਥੇਬੰਦੀਆਂ ਦਾ ਮੋਰਚਾ ਤੇ ਪੰਜਾਬ ਦੀ ਭਗਵੰਤ ਮਾਨ ਸਰਕਾਰ ਦੋਵੇਂ ਧਿਰਾਂ ਹੀ ਜੇਤੂ ਨਜ਼ਰ ਆਈਆਂ। ਹਾਲਾਂਕਿ ਇਹ ਸੋਚਣ ਵਾਲੀ ਗੱਲ ਹੈ ਕਿ ਜਿਹੜੀਆਂ ਮੰਗਾਂ 'ਤੇ ਇਹ ਮੋਰਚਾ ਲਾਇਆ ਗਿਆ ਕੀ ਉਹ ਸੱਚਮੁੱਚ ਏਨੀਆਂ ਮਹੱਤਵਪੂਰਨ ਸਨ ਕਿ ...
ਅਜੋਕੇ ਸਮੇਂ ਪੰਜਾਬ ਦੇ ਬਹੁਤੇ ਵਿਦਿਆਰਥੀ 10+2 (ਬਾਰ੍ਹਵੀਂ) ਕਰਨ ਉਪਰੰਤ ਆਇਲਟਸ ਕਰਕੇ ਕੈਨੇਡਾ ਪੜ੍ਹਨ ਵਾਸਤੇ ਜਾ ਰਹੇ ਹਨ। ਇਸ ਦਾ ਜ਼ਿਆਦਾਤਰ ਮੰਤਵ ਕੈਨੇਡਾ ਵਿਚ ਵਸਣਾ ਹੁੰਦਾ ਹੈ। ਅਸਲ ਵਿਚ ਉਹ ਰੁਜ਼ਗਾਰ ਅਤੇ ਚੰਗੀ ਸੁਖਾਵੀਂ ਸਹੂਲਤਾਂ ਭਰਪੂਰ ਜ਼ਿੰਦਗੀ ਜਿਊਣ ਦੇ ...
ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਭੁਪਾਲ (ਮੱਧ ਪ੍ਰਦੇਸ਼) 'ਚ ਕਿਹਾ ਸੀ ਕਿ ਭਾਜਪਾ ਦੇ ਘੋਸ਼ਣਾ ਪੱਤਰ ਵਿਚ ਕੀਤੇ ਗਏ ਵਾਅਦਿਆਂ ਅਨੁਸਾਰ ਰਾਮ ਮੰਦਰ ਨਿਰਮਾਣ, ਆਰਟੀਕਲ 370, ਤਿੰਨ ਤਲਾਕ ਦਾ ਕੰਮ ਪੂਰਾ ਹੋ ਗਿਆ ਹੈ ਅਤੇ ਹੁਣ ਸਮਾਨ ਨਾਗਰਿਕ ਸੰਹਿਤਾ ਯੂਨੀਫਾਰਮ ਸਿਵਲ ਕੋਡ ...
Website & Contents Copyright © Sadhu Singh Hamdard Trust, 2002-2021.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered
by REFLEX